پیرس کے نواحی علاقے سارسل میں سارسل کرکٹ اکیڈمی اور کرکٹ اسٹیڈیم ایمی ذولا کا افتتاح  کردیا گیا ہے۔

افتتاحی تقریب میں سفیر پاکستان عاصم افتخار احمد سمیت پیرس کے نواحی علاقے سارسل کے میئر مسٹر پیٹرک ہیدد اور فرانسیسی ممبر پارلیمنٹ کارلوس مارٹن  نے خصوصی شرکت کی-

پاکستان اور بنگلا دیش کے ٹیموں کے درمیان دوستانہ میچ بھی کھیلا گیا جب کہ افتتاحی تقریب سارسل کے کرکٹ گراؤنڈ میں منعقد ہوئی۔

فرانسں میں کرکٹ کے فروغ کے لیے کرکٹ اکیڈمی کا باقاعدہ افتتاح کیا گیا ہے۔ کرکٹ اکیڈمی کا افتتاح فرانس میں پاکستان کے سفیر عاصم افتخار احمد اور سارسل کے میئر نے ایک ساتھ فیتہ کاٹ کر کیا۔

سفیر پاکستان فرانس عاصم افتخار نے کہا کہ پاکستان، فرانس میں کرکٹ کو فروغ دینے کے لیے اپنا مثبت کردار ادا کرتا رہے گا تاکہ دونوں ممالک کے عوام کے درمیان موجودہ دوستانہ تعلقات کو مزید مستحکم کیا جاسکے۔

میئر مسٹر پاترک ہاداد نے کہا کہ اس طرح سے نوجوانوں میں کھیل اور تعمیری مصروفیات کے رحجان کو ترغیب دینے میں مدد ملے گی جب کہ مختلف سماجی اور ثقافتی سرگرمیوں سے نوجوانوں کو ایک دوسرے کو سمجھنے کا موقع بھی ملے گا۔

کرکٹ اکیڈمی کے مالک امجد سندھو نے سفیر عاصم افتخار اور میئر کے ہمراہ کرکٹ میں استعمال ہونے والے سازو سامان کے اسٹال کا بھی دورہ کیا۔ا