پاکستان کے خلاف ٹیسٹ سیریز میں سری لنکا کے کپتان دیموتھ کرونا رتنے کا باہر ہونے کا امکان ہے۔

پاکستان کے خلاف ٹیسٹ سیریز سے قبل سری لنکا کو بڑا دھچکا لگا ہے کیونکہ ان کے کپتان دیموتھ  کرونارتنے کی ہیمسٹرنگ انجری کے باعث پہلے ٹیسٹ میں شرکت مشکوک ہوگئی ہے۔

میڈٰیا رپورٹس کے مطابق سری لنکن کپتان اگلے 48 گھنٹوں میں اپنا فٹنس ٹیسٹ کروائیں گے جس کے بعد انہیں اسکواڈ میں شامل کرنے یا نہ کرنے کا فیصلہ کیا جائے گا۔

دیموتھ کرونا رتنے کی غیر موجودگی میں سری لنکن ٹیم کی قیادت نائب کپتان دھننجایا ڈی سلوا کریں گے جب کہ سری لنکا نے پاکستان کے خلاف پہلے ٹیسٹ کے لیے اسکواڈ کو حتمی شکل دے دی ہے۔

تاہم حتمی فیصلہ دیموتھ  کرونارتنے کی رپورٹ سامنے آنے کے بعد کیا جائے گا جب کہ سری لنکا کے لاہیرو کمارا بھی سائیڈ اسٹرین انجری کا شکار ہوگئے ہیں جس کے باعث وہ پہلے ٹیسٹ میں شرکت نہیں کریں گے۔

واضح رہے کہ دونوں ٹیموں کے درمیان سیریز کا پہلا ٹیسٹ میچ 16 جولائی سے شروع ہوگا جبکہ دوسرا ٹیسٹ میچ کولمبو میں 24-28 جولائی تک کھیلا جائے گا۔