پاکستان کے سابق فاسٹ بولر عمر گل نے سرفراز احمد کو بابر اعظم سے بہتر کپتان قرار دے دیا ہے۔

قومی ٹیم کے سابق فاسٹ بولر عمر گل کا خیال ہے کہ سرفراز احمد بابر اعظم کے مقابلے میں بہتر کپتان ہیں۔

واضح رہے کہ سرفراز احمد کی کپتانی میں پاکستان نے اہم سنگ میل عبور کیے ہیں، قومی ٹیم نے 2017 میں آئی سی سی چیمپئنز ٹرافی جیتی اور لگاتار 11 ٹی ٹوئنٹی سیریز میں فتوحات حاصل کی تھیں۔

دوسری جانب جب عمر گل سے محمد عامر اور شاہین شاہ آفریدی میں سے کسی ایک الٹے ہاتھ کے بولر کا انتخاب کرنے کا کہا گیا تو انہوں نے محمد عامر کو منتٰخب کیا۔

گزشتہ ماہ ایک انٹرویو میں عمر گل نے محمد عامر کے ریٹائرمنٹ کے فیصلے پر حیرت کا اظہار کیا تھا۔

ان کا کہنا تھا کہ ’’مجھے اس وقت حیرت ہوئی جب محمد عامر نے بین الاقوامی کرکٹ سے ریٹائرمنٹ لینے کا فیصلہ کیا‘‘۔

انہوں نے کہا کہ یہ کوئی معمولی بات نہیں ہے کہ جب کھلاڑیوں کی کارکردگی کم ہوتی ہے تو انہیں چیلنجز کا سامنا کرنا پڑتا ہے۔ تاہم یہ یاد رکھنا ضروری ہے کہ ڈراپ ہونے کی وجہ آپ ہمیشہ کسی مخصوص کوچ یا فرد پر الزام عائد نہیں کرسکتے۔

عمر گل کا کہنا تھا کہ کسی پر الزام لگانے کے بجائے بہتر ہے کہ اپنے آپ کو جوابدہ سمجھیں اور ذمہ داری قبول کریں۔

انہوں نے مزید کہا تھا کہ ’’جب آپ خود پر الزام لگاتے ہیں تو یہ ترقی کا ایک موقع بن جاتا ہے۔ ان چیلنجز کو قبول کرنے سے بالآخر آپ کی کارکردگی بہتر ہوتی ہے‘‘۔