آئی سی سی نے مینز اور ویمنز کرکٹ کے لیے یکساں انعامی رقم کا اعلان کردیا ہے۔

انٹرنیشنل کرکٹ کونسل (آئی سی سی) نے آج آئی سی سی ایونٹس میں مردوں اور خواتین کی ٹیموں کے لیے یکساں انعامی رقم کا اعلان کیا ہے جب کہ ٹیسٹ کرکٹ میں اوور ریٹ کی پابندیوں میں بھی تبدیلیاں کی گئی ہیں۔

یہ فیصلہ جنوبی افریقہ کے ڈربن میں منعقدہ آئی سی سی کی سالانہ کانفرنس کے دوران کیا گیا ہے۔

ٹیموں کو اب تقابلی ایونٹس میں ایک جیسی پوزیشنز پر فائز کرنے کے لیے مساوی انعامی رقم کے ساتھ ساتھ ان ایونٹس میں میچ جیتنے پر بھی اتنی ہی رقم ملے گی۔

آئی سی سی کے چیئرمین گریگ بارکلے کا کہنا ہے کہ ’’یہ ہمارے کھیل کی تاریخ کا ایک اہم لمحہ ہے اور مجھے خوشی ہے کہ آئی سی سی کے عالمی مقابلوں میں حصہ لینے والے مردوں اور خواتین کرکٹرز کو اب یکساں طور پر انعام دیا جائے گا‘‘۔

انہوں نے کہا کہ ’’2017 کے بعد سے ہم نے ہر سال خواتین کے مقابلوں میں انعامی رقم میں اضافہ کیا ہے۔ آئی سی سی ویمنز کرکٹ ورلڈ کپ جیتنے پر وہی انعامی رقم ہوگی جو کہ آئی سی سی مینز کرکٹ ورلڈ کپ جیتنے والی مینز ٹیم کی ہوگی جب کہ ٹی ٹوئنٹی ورلڈ کپ اور انڈر 19 میں بھی ایسا ہی ہوگا‘‘۔

انہوں نے مزید کہا کہ کرکٹ حقیقی طور پر سب کے لیے ایک کھیل ہے اور آئی سی سی بورڈ کا یہ فیصلہ اس بات کو تقویت دیتا ہے اور ہمیں اس قابل بناتا ہے کہ ہم کھیل میں ہر ایک کھلاڑی کی قدر کریں۔

واضح رہے کہ کہ آئی سی سی ویمنز ٹی ٹوئنٹی ورلڈ کپ 2020 اور 2023 میں فاتح اور رنر اپ کو بالترتیب 1 ملین ڈالر اور 5 لاکھ ڈالر کی رقم دی گئی تھی جو کہ 2018 کے مقابلے میں پانچ گنا زیادہ تھی۔

آئی سی سی ویمنز کرکٹ ورلڈ کپ 2022 کی انعامی رقم بھی 20 لاکھ ڈالر سے بڑھ کر 3.5 ملین ڈالر کردی گئی تھی۔