قومی آل راؤنڈر شاداب خان نے میجر لیگ کرکٹ کے افتتاحی ایڈیشن میں دھوم مچادی ہے۔

میجر لیگ کرکٹ میں جمعہ کو سان فرانسسکو یونیکورنز کا میچ ایم آئی نیویارک سے ہوا جس میں شاداب خان نے اپنی ٹیم سان فرانسسکو یونیکورنز کو جیت دلوانے میں اہم کردار ادا کیا۔

اننگز کے ابتدا میں سان فرانسسکو یونیکورنز کی بیٹنگ لائن لڑکھڑا گئی اور ٹاپ آرڈر بلے باز تیزی سے آؤٹ ہوگئے تاہم شاداب خان اور کوری اینڈرسن نے ٹیم کو سہارا دیا اور ایک اہم شراکت قائم کی۔

سات اوورز کے اختتام پر سان فرانسسکو یونیکورنز کے 50 رنز پر 4 کھلاڑی پویلین لوٹ چکے تھے جس کے بعد شاداب خان اور کوری اینڈرسن نے 129 رنز کی شاندار شراکت قائم کی۔

ابتدا میں شاداب خان نے سست رفتاری سے کھیلا اور چھ گیندوں پر صرف تین رنز ہی اسکور کیے لیکن پھر ان کی بیٹنگ میں تیزی آئی جس کے بعد انہوں نے جارحانہ کھیل پیش کیا۔

قومی کھلاڑی نے صرف 23 گیندوں پر اپنی نصف سنچری مکمل کی اور پھر وہ 30 گیندوں پر چار چوکوں اور پانچ چھکوں کی مدد سے 61 رنز بناکر آؤٹ ہوئے۔

شاداب خان کی جارحانہ اننگز کی بدولت سان فرانسسکو یونیکورنز 215 رنز بنانے میں کامیاب ہوئی جب کہ اس وقت ان کی صرف 5 وکٹیں ہی گری تھیں۔

کوری اینڈرسن نے بھی شاداب خان کا بھرپور ساتھ دیا اور 52 گیندوں پر 91 رنز کی ناقابل شکست اننگز کھیلی۔

شاداب خان نے نہ صرف بیٹنگ بلکہ بولنگ میں بھی عمدہ کارکردگی دکھائی اور 32 رنز دے کر 3 کھلاڑیوں کو آؤٹ کیا۔

ہدف کے تعاقب میں ایم آئی نیویارک مقررہ 20 اوورز میں 193 رنز ہی اسکور کرسکی جس کے بعد سان فرانسسکو یونیکورنز نے یہ میچ 22 رنز سے اپنے نام کیا۔