پی سی بی نے قومی کھلاڑیوں کو سفر کی اجازت نہیں دی ہے جس کے باعث قومی کھلاڑی حارث رؤف کے ولیمے میں شرکت نہیں کرسکیں گے۔

پاکستان کرکٹ بورڈ (پی سی بی) کے ترجمان کا کہنا ہے کہ خراب موسم کی وجہ سے کھلاڑیوں کو واپس کراچی آنے میں مشکلات کا سامنا ہوگا اور انہیں پرواز نہیں مل سکیں گی۔

پی سی بی ترجمان کے مطابق اسی وجہ سے کھلاڑیوں کو اسلام آباد جانے کی اجازت نہیں دی گئی ہے۔

واضح رہے کہ قومی کھلاڑیوں کو آج اسلام آباد روانہ ہونا تھا جب کہ کھلاڑیوں نے حارث رؤف کے ولیمے میں شرکت کرکے کل دوپہر واپس کراچی آنے کا پلان بنا رکھا تھا۔

تاہم اجازت نہ ملنے کے باعث آج کھلاڑی حارث رؤف کے ولیمے میں شرکت نہیں کرسکیں گے۔

خیال رہے کہ حارث رؤف کی بارات گزشتہ روز ہوئی جس میں انہوں نے مہرون کلر کا کلہ اور سیاہ دنگ کی شیروانی پہن رکھی تھی۔

یاد رہے کہ سری لنکا کے خلاف ٹیسٹ سیریز کے لیے قومی ٹیم ہفتے کی رات براستہ دبئی کولمبو روانہ ہوگی جب کہ کھلاڑیوں کا تربیتی کیمپ آج ختم ہوجائے گا۔