افغانستان نے پاکستان کے خلاف تین ون ڈے میچز پر مشتمل ون ڈے سیریز کی تصدیق کردی ہے۔

پاکستان اور افغانستان کی ٹیموں کے درمیان تین ون ڈے میچز پر مشتمل ون ڈے سیریز اگست میں کھیلی جائی گی جس کی تصدیق افغانستان نے کردی ہے۔

افغان میڈیا رپورٹس کے مطابق افغانستان کرکٹ بورڈ نے منگل کو کہا ہے کہ افغانستان اور پاکستان کے درمیان اگست میں تین ون ڈے میچز پر مشتمل سیریز کھیلی جائے گی۔

اس سے قبل پاکستان کرکٹ بورڈ کی جانب سے 2023 تا 2025 کے لیے فیوچر ٹور پروگرام کا اعلان کیا گیا تھا جس میں پاکستان بمقابلہ اٖفغانستان ون ڈے سیریز اگست میں شیڈول تھی۔

تاہم سیریز کا مقام اور تاریخوں کا اعلان ہونا ابھی باقی ہے لیکن سیریز متحدہ عرب امارات میں ہونے کا امکان ہے۔

واضح رہے کہ رواں سال کے شروع میں دونوں ٹیموں کے درمیان شارجہ میں تین میچز پر مشتمل ٹی ٹوئنٹی سیریز کھیلی گئی تھی جسے افغانستان نے 2-1 سے اپنے نام کیا تھا۔

دونوں ممالک کے درمیان مذکورہ سیریز ایشیا کپ 2023 کی تیاری کا کام کرے گی۔

یاد رہے کہ ایشیاکپ 31 اگست سے 17 ستمبر تک ہائبرڈ ماڈل کے تحت کھیلا جانا ہے جس کے مطابق ٹورنامنٹ کے پہلے چار میچز پاکستان جب کہ فائنل سمیت نو میچز سری لنکا میں کھیلے جانے ہیں۔