سابق کپتان شاہد آفریدی نے بھارت کے خلاف شاہین آفریدی کی بولنگ پر انہیں تنقید کا نشانہ بنایا ہے۔

مقامی میڈیا کو انٹرویو میں شاہد آفریدی نے بھارت کے خلاف شاہین آفریدی کی بولنگ پر تنقید کرتے ہوئے ان کی کارکردگی پر عدم اطمینان کا اظہار کیا ہے۔

شاہد آفریدی نے کھیل کی اسٹریٹجک باریکیوں اور کرکٹ کے جدید دور میں بولرز کو درپیش چیلنجز پر بھی روشنی ڈالی۔

پاکستان کے ٹاس جیت کر پہلے بولنگ کرنے کے فیصلے پر تبادلہ خیال کرتے ہوئے سابق کپتان نے کہا کہ بہت سے لوگوں نے سوشل میڈیا پر اس فیصلے کو تنقید کا نشانہ بنایا ہے۔

شاہد آفریدی کہتے ہیں ’’میری رائے میں اگر پاکستان نے صحیح بولنگ کی ہوتی جیسے نسیم شاہ نے آغاز کیا تھا تو نتائج مختلف ہوتے لیکن شاہین کی لائن اور لینتھ میچ میں ٹھیک نہیں تھی‘‘۔

انہوں نے داماد پر تنقید کرتے ہوئے کہا کہ شاہین جس جگہ بولنگ کروانا چاہ رہے تھے وہ ان سے نہیں ہوپارہی تھی، اگر شروع کے اوورز میں شاہین وکٹیں حاصل نہیں کرپاتے ہیں تو یہ ان کے لیے مایوسی کا سبب بن جاتا ہے کیونکہ ان کی ساکھ ہی جلدی وکٹیں لینے والے بولر کی ہے۔

سابق کپتان نے کہا کہ شاہین کی کارکردگی کا ٹیم پر خاصا اثر پڑا، انہیں اپنی لائن اور لینتھ میں مستقل مزاجی کی ضرورت ہے۔ یہ کوئی عذر نہیں کہ اگر آپ ایک یا دو اوور میں وکٹ نہ لے سکیں تو خود پر غصہ آجائے۔

شاہد آفریدی نے داماد کو مشورہ دیتے ہوئے کہا کہ ’’آپ کو کرکٹ میں نرم گوشہ رکھنا ہوگا اور فوکس کرنا ہوگا، اس لیے انہیں اپنی مخصوص لائن اور لینتھ پر توجہ دینی چاہیے‘‘۔

انہوں نے مزید کہا کہ ’’یہ ہمیشہ ضروری نہیں کہ آپ کو وکٹ ملے، اگر آپ صحیح جگہ پر گیند کریں گے تو وکٹ ملے گی کیونکہ نئی گیند سے وکٹیں لینے کے امکانات ہمیشہ زیادہ ہوتے ہیں‘‘۔

واضح رہے کہ ایشیاکپ سپر فور مرحلے کے میچ میں پاکستان کو بھارت کے ہاتھوں بدترین شکست کا سامنا کرنا پڑا تھا، قومی ٹیم 356 رنز کے ہدف کے تعاقب میں صرف 128 رنز پر ڈھیر ہوگئی تھی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/sports/2023/09/480269/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/sports/2023/09/480269/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں