ورلڈکپ کے 17 ویں میچ بھارت نے بنگلادیش کو شکست دے کر مسلسل چوتھی فتح حاصل کرلی ہے۔

آئی سی سی مینز کرکٹ ورلڈکپ 2023 کا 17 واں میچ بھارت اور بنگلادیش کی ٹیموں کے درمیان بھارتی شہر پونے میں کھیلا گیا جس میں بھارت نے کامیابی اپنے نام کی۔

بنگلادیش نے ٹاس جیت کر پہلے بیٹنگ کرنے کا فیصلہ کیا اور مقررہ اوورز میں 8 وکٹوں کے نقصان پر 257 رنز کا ہدف دیا جس کو بھارت نے باآسانی 41.3 اوورز میں 3 وکٹوں کے نقصان پر حاصل کرلیا۔

بنگلادیش کی بیٹنگ

بنگلادیش کی جانب سے لٹن داس 66 رنز بناکر نمایاں رہے جب کہ تنزید حسن 51 رنز بناسکے اور محمود اللہ 46 رنز بناکر آؤٹ ہوئے۔

علاوہ ازیں مشفیق الرحیم 38، توحید ہردوئے 16 اور نسیم احمد 14 رنز بناسکے۔

بھارت کی جانب سے رویندرا جڈیجا نے 2 کھلاڑیوں کو آؤٹ کیا جب کہ محمد سراج، جسپریت بمراہ، شاردل ٹھاکر اور کلدیپ یادیو نے ایک ایک وکٹ حاصل کی۔

بھارت کی بیٹنگ

بھارت کی جانب سے ویرات کوہلی 103 رنز بناکر ناقابل شکست رہے جب کہ شبھمن گل 53 اور روہت شرما نے 48 رنز کی اننگز کھیلی۔

علاوہ ازیں شریاس ائیر 19 رنز بناکر پویلین لوٹے اور کے ایل راہول 34 رنز بناکر ناٹ آؤٹ رہے جب کہ بنگلادیش کی جانب سے مہدی حسن میراز نے 2 اور حسن محمود نے ایک وکٹ حاصل کی۔

خیال رہے کہ بھارت کی ایونٹ میں یہ مسلسل چوتھی فتح ہے جس کے بعد بھارت پوائنٹس ٹیبل پر 8 پوائنٹس کے ساتھ دوسری پوزیشن پر برقرار ہے۔

پوائنٹس ٹیبل پر نیوزی لینڈ 8 پوائنٹس کے ساتھ بدستور سرفہرست، جنوبی افریقہ 4 پوائنٹس کے ساتھ تیسرے اور پاکستان 4 پوائنٹس کے ساتھ چوتھے نمبر پر ہے۔

انگلینڈ، آسٹریلیا، بنگلا دیش، نیدرلینڈز اور افغانستان دو، دو پوائنٹس کے ساتھ رن ریٹ کے فرق سے بالترتیب پانچویں، چھٹی، ساتویں، آٹھویں اور نویں پوزیشن پر ہیں جب کہ سری لنکا تینوں میچز میں ناکامی کے بعد آخری پوزیشن پر ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/sports/2023/10/889006/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/sports/2023/10/889006/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں