پاکستان کرکٹ بورڈ (پی سی بی) مینجمنٹ کمیٹی کے چیئرمین ذکا اشرف ہفتے کو بھارت پہنچ گئے ہیں۔

پی سی بی مینجمنٹ کمیٹی کے چیئرمین ذکا اشرف ہفتے کو احمد آباد میں ہونے والے آئی سی سی ایگزیکٹو بورڈ کے آئندہ اجلاس میں شرکت کے لیے بھارت پہنچ گئے ہیں۔

ان کے ہمراہ چیف آپریٹنگ آفیسر سلمان ناصر بھی موجود ہیں جب کہ دونوں عہدیدار اجلاس میں شرکت کے بعد اتوار کو ہونے والا ورلڈکپ فائنل بھی دیکھیں گے۔

پی سی بی ذرائع کے مطابق اجلاس کے ایجنڈے میں ورلڈکپ کی کارکردگی، ریونیو جنریشن، تماشائیوں کے ٹرن آؤٹ کے ساتھ ساتھ ون ڈے فارمیٹ کا مستقبل اور پاکستان میں 2025 کی چیمپئنز ٹرافی کی ممکنہ میزبانی کے بارے میں غور و خوض کرنا شامل ہے۔

یاد رہے کہ ذکاء اشرف اس سے قبل 14 اکتوبر کو پاک بھارت ہائی وولٹیج میچ دیکھنے کے لیے بھارت کے شہر حیدر آباد پہنچے تھے جب کہ اس میچ میں بھارت نے 7 وکٹوں سے کامیابی اپنے نام کی تھی۔

دوسری جانب پاکستان کے ورلڈکپ کے سیمی فائنل میں کوالیفائی نہ کرنے پر بابر اعظم نے تینوں فارمیٹس سے کپتانی چھوڑنے کا اعلان کیا تھا۔