پاکستان کرکٹ بورڈ کی مینجمنٹ کمیٹی کے چیئرمین ذکاء اشرف کہتے ہیں پاکستان ٹیم میں کوئی لڑائی نہیں اور پوری ٹیم متحد ہے۔

لاہور میں میڈیا سے گفتگو کرتے ہوئے پی سی بی مینجمنٹ کمیٹی کے چیئرمین ذکاء اشرف نے کہا کہ ٹیم میں اندرون خانہ کوئی لڑائی نہیں ہے اور پوری ٹیم متحد ہے۔

انہوں نے کہا کہ ابھی میں نے ہی بابر اعظم کو دوبارہ فون کرکے نیک تمناؤں کا اظہار کیا ہے جب کہ بابر اعظم نے کہا ہے کہ فکر نہ کریں پوری ٹیم زور لگائے گی۔

ان کا کہنا تھا کہ نیوزی لینڈ کے خلاف ہمارے اوپنرز نے شاندار پرفارمنس دی ہے اور فخر زمان کو سنچری اسکور کرنے پر میں نے مبارکباد کے ساتھ 10 لاکھ روپے کا اعلان کیا ہے۔

ذکاء اشرف کہتے ہیں احمد آباد کے گراؤنڈ میں پاکستان کا اتنا بڑا پرچم دیکھ کر میرے جذبات بے قابو ہوگئے تھے جب کہ بھارتی کرکٹ بورڈ نے گراؤنڈ میں پاکستان کا قومی ترانہ بھی چلایا۔

انہوں نے مزید کہا کہ فضول کہانیاں کرکٹ کے دشمن اڑاتے ہیں جب کہ ٹیم کے لیے میری نیک خواہشات اور دعائیں ہیں، اللہ انہیں کامیاب کرے۔

یاد رہے کہ ورلڈکپ میں قومی ٹیم کا اگلا مقابلہ انگلینڈ سے ہوگا جو 11 نومبر کو کولکتہ میں کھیلا جائے گا جب کہ سیمی فائنل میں کوالیفائی کے لیے قومی ٹیم کا یہ میچ جیتنا انتہائی ضروری ہے۔

انگلینڈ کے خلاف جیت کے بعد بھی قومی ٹیم کا کوالیفائی کرنا مشکل نظر آرہا ہے تاہم قومی ٹیم کی قسمت کا فیصلہ افغانستان کے میچز کے نتائج پر منحصر ہے۔

اگر افغانستان اگلے دونوں میچز ہار جائے اور نیوزی لینڈ بھی اپنا اگلا میچ ہار جائے تو پاکستان کوالیفائی کرجائے گا یا اگر نیوزی لینڈ میچ جیت جائے تو دونوں ٹیموں کے درمیان رن ریٹ کو دیکھتے ہوئے فیصلہ کیا جائے گا۔

واضح رہے کہ پوائنٹس ٹیبل پر پاکستان کا اس وقت رن ریٹ 0.036 ہے جب کہ نیوزی لینڈ کا 0.398 ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/sports/2023/11/614014/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/sports/2023/11/614014/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں