آسٹریلوی بلے باز عثمان خواجہ نے پاکستان کے دورہ آسٹریلیا کے لیے بیٹنگ لائن کو مضبوط قرار دے دیا ہے۔

حال ہی میں میڈیا کو دیے گئے انٹرویو میں آسٹریلوی بلے باز عثمان خواجہ نے پاکستانی بیٹر بابر اعظم، امام الحق اور عبداللہ شفیق جیسے کھلاڑیوں کی کارکردگی پر روشنی ڈالی اور اس کمبی نیشن کو بہترین قرار دیا۔

انہوں نے کہا ’’پاکستان دنیا کی بیترین ٹیموں میں سے ایک ہے، ان کے پاس اچھی بیٹنگ ہے اور ہمیشہ کی طرح بہترین فاسٹ بولرز موجود ہیں‘‘۔

یہ بھی پڑھیں: سرفراز یا رضوان، دورہ آسٹریلیا پر وکٹ کیپر کون ہوگا؟ شان مسعود نے بتادیا

عثمان خواجہ کہتے ہیں ’’بابر اعظم دنیا کے بہترین بلے بازوں میں سے ایک ہیں جب کہ امام الحق اور عبداللہ شفیق نے بھی بہت زیادہ رنز اسکور کیے ہیں‘‘۔

آسٹریلوی بلے باز نے کہا کہ میں اس چیلنج کر لے کر بہت پرجوش ہوں، اسٹیو اسمتھ ہمارے دور کے عظیم ترین بلے باز ہیں جب کہ بابر اعظم اور اسٹیو اسمتھ کا یہاں ایک ساتھ سیریز میں مدمقابل کھیلنا دلچسپ ہوگا۔

انہوں نے یہ بھی کہا کہ بابر اعظم کے بارے میں ایک بڑی بات یہ ہے کہ وہ صرف پاکستان میں ہی رنز نہیں بناتے بلکہ وہ بیرون ملک بھی رنز بناتے ہیں اور ماضی میں انہوں نے یہاں سنچری بھی اسکور کی تھی۔

دونوں ٹیموں کی بولنگ پر بات کرتے ہوئے ان کا کہنا تھا ’’شاہین آفریدی اور مچل اسٹارک دونوں فاسٹ بولر ہیں اور میرے خیال سے دونوں ہی 145 کی اسپیڈ سے بولنگ کرسکتے ہیں‘‘۔

انہوں نے مزید کہا ’’مچل اسٹارک نئی گیند سے سوئنگ کرتے ہیں اور شاہین آفریدی کی بھی کلائی اچھی ہے اور وہ بھی سوئنگ کرتے ہیں، اگر کوئی فاسٹ بولر سوئنگ کررہا ہو تو بطور اوپنر وہ ہمارے لیے کام مشکل بنادیتا ہے‘‘۔

یاد رہے کہ شان مسعود کی قیادت میں پاکستان کرکٹ ٹیم ٹیسٹ سیریز کے لیے آج لاہور سے سڈنی کے لیے روانہ ہوگئی ہے۔

دونوں ٹیموں کے درمیان تین ٹیسٹ میچز پر مشتمل سیریز کھیلی جائے گی جب کہ پہلا میچ  14 دسمبر کو پرتھ میں کھیلا جائے گا، دوسرا ٹیسٹ 26 سے 30 دسمبر تک میلبرن کرکٹ گراؤنڈ اور تیسرا و آخری ٹیسٹ 3 جنوری 2024 کو سڈنی میں ہوگا۔