سابق آسٹریلوی کھلاڑی رکی پونٹنگ نے کیمرون بینکروفٹ کو ڈیوڈ وارنر کا متبادل قرار دے دیا ہے۔

آسٹریلوی کھلاڑی ڈیوڈ وارنر نے رواں سال کے شروع میں اعلان کیا تھا کہ وہ پاکستان کے خلاف ٹیسٹ سیریز کے بعد ٹیسٹ فارمیٹ سے ریٹائر ہونے کا ارادہ رکھتے ہیں۔

اعلان کے بعد آسٹریلوی ٹیم میں کئی کھلاڑیوں نے ان کی جگہ پر نظریں جمالیں تھیں جب کہ آئی سی سی ہال آف فیم میں شامل سابق آسٹریلوی کھلاڑی رکی پونٹنگ نے ڈیوڈ وارنر کے متبادل کا نام بتادیا ہے۔

رکی پونٹنگ کہتے ہیں ’’میرے خیال میں کیمرون بینکروفٹ ہی ڈیوڈ وارنر کے بہترین متبادل ہوسکتے ہیں کیونکہ پچھلے کچھ سالوں میں انہوں نے ڈومیسٹک سطح پر اچھا پرفارم کیا ہے‘‘۔

یہ بھی پڑھیں: عثمان خواجہ نے پاکستان کی بیٹنگ لائن کو مضبوط قرار دے دیا

یاد رہے کہ پاکستان کے خلاف ٹیسٹ سیریز کا آغاز 14 دسمبر سے پرتھ میں ہورہا ہے جس کے بعد جنوری میں آسٹریلوی ٹیم ویسٹ انڈیز کے خلاف دو میچز کھیلے گی۔

واضح رہے کہ آسٹریلیا فی الحال آئی سی سی ورلڈ ٹیسٹ چیمپیئن شپ میں تیسرے نمبر پر موجود ہے  جب کہ رواں سال کے شروع میں ہونے والی ایشز سیریز 2-2 سے برابر ہوگئی تھی۔