آسٹریلیا کے خلاف سڈنی میں کھیلے جانے والے تیسرے ٹیسٹ میچ میں شاہین آفریدی کو آرام دیے جانے کا امکان ہے۔

پاکستان اور آسٹریلیا کی ٹیموں کے درمیان تین ٹیسٹ میچز پر مشتمل سیریز جاری ہے جس کا دوسرے ٹیسٹ 26 سے 30 دسمبر تک میلبرن میں کھیلا جائے گا جب کہ پہلے ٹیسٹ میں پاکستان کو 360 رنز سے شکست کا سامنا کرنا پڑا تھا۔

خبر رساں ادارے کی رپورٹ کے مطابق اگر پاکستان کو دوسرے ٹیسٹ میں بھی شکست کا سامنا کرنا پڑتا ہے تو شاہین آفریدی کو تیسرے ٹیسٹ میں آرام کروایا جائے گا۔

رپورٹ کے مطابق شاہین آفریدی بیک ٹو بیک میچز کی وجہ سے تھکاوٹ کا شکار ہیں جب کہ ٹیم انتظامیہ چاہتی ہے کہ وہ نیوزی لینڈ کے خلاف سیریز سے قبل تازہ دم ہوجائیں۔

واضح رہے کہ تیسرا ٹیسٹ 7 جنوری کو ختم ہوگا جس کے فوری بعد نیوزی لینڈ کے خلاف ٹی ٹوئنٹی سیریز کا آغاز 12 جنوری سے ہوگا جب کہ دونوں سیریز کے درمیان بہت ہی کم وقفہ ہے۔