پرتھ ٹیسٹ میں آسٹریلیا کے خلاف سلو اوور ریٹ پر پاکستان ٹیم پر جرمانہ عائد کردیا گیا۔

انٹرنیشنل کرکٹ کونسل (آئی سی سی) کی جانب سے پرتھ ٹیسٹ میں سلو اوور ریٹ پر پاکستان ٹیم پر جرمانہ عائد کیا گیا ہے۔

آئی سی سی کے مطابق پاکستان ٹیم پر میچ فیس کا 10 فیصد جرمانہ عائد کیا گیا ہے جب کہ ٹیم کے آئی سی سی ورلڈ ٹیسٹ چیمپئن شپ کے دو پوائنٹس بھی کاٹ لیے گئے ہیں۔

آئی سی سی کا کہنا ہے کہ پاکستان کرکٹ ٹیم کے کھلاڑیوں پر بھی میچ فیس کا پانچ فیصد جرمانہ عائد کیا گیا ہے۔

یاد رہے کہ پرتھ ٹیسٹ میں آسٹریلیا کے خلاف پاکستان کو 360 رنز سے عبرتناک شکست کا سامنا کرنا پڑا تھا۔

آسٹریلیا نے پہلی اننگز میں 487 رنز اسکور کیے تھے جس کے جواب میں قومی ٹیم 271 رنز پر آل آؤٹ ہوگئی تھی جب کہ پاکستان کو پہلی اننگز میں 216 رنز کے خسارے کا سامنا تھا۔

آسٹریلیا نے دوسری اننگز میں 233 رنز 5 کھلاڑی آؤٹ پر اپنی اننگز ڈکلیئر کردی تھی جب کہ پاکستان کو جیت کے لیے 450 رنز کا ہدف دیا تھا۔

تاہم قومی ٹیم دوسری اننگز میں بھی بری طرح ناکام ثابت ہوئی اور پوری ٹیم صرف 89 رنز پر ہی پویلین لوٹ گئی۔