شاداب خان کی نیشنل ٹی ٹوئنٹی کپ میں پاؤں میں انجری کے باعث نیوزی لینڈ کے خلاف ٹی ٹوئنٹی سیریز میں شرکت مشکوک نظر آرہی ہے۔

قومی ٹیم کے آل راؤنڈر شاداب خان نیشنل ٹی ٹوئنٹی کپ کے دوران پاؤں میں انجری کا شکار ہوگئے تھے جس کے باعث نیوزی لینڈ کے خلاف ٹی ٹوئنٹی سیریز میں ان کی شرکت مشکوک ہے۔

قومی کھلاڑی چوٹ لگنے کے بعد سے ایکشن میں نظر نہیں آرہے ہیں تاہم شاداب خان ٹی ٹوئنٹی سیریز کے لیے فٹنس حاصل کرنے کی بھرپور کوشش کررہے ہیں۔

خیال رہے کہ نیوزی لینڈ کے خلاف ٹی ٹوئنٹی سیریز کے لیے حتمی اسکواڈ کا اعلان 19 دسمبر کو کیا جائے گا۔

اس سے قبل وہاب ریاض کی سربراہی میں سلیکشن کمیٹی کراچی میں حال ہی میں منعقد ہونے والے نیشنل ٹی ٹوئنٹی کپ میں کھلاڑیوں کی کارکردگی کا جائزہ لے گی۔

ٹی ٹوئنٹی کے ممکنہ کھلاڑیوں کا تربیتی کیمپ 25 دسمبر سے نیشنل کرکٹ اکیڈمی لاہور میں شروع ہوگا۔

یاد رہے کہ نیوزی لینڈ کے خلاف پانچ ٹی ٹوئنٹی میچز پر مشتمل سیریز کا آغاز 12 جنوری سے ہونے جارہا ہے جب کہ پہلا میچ آکلینڈ میں شیڈول ہے۔

دوسرا میچ 14 جنوری کو ہیملٹن میں کھیلا جائے گا جب کہ تیسرا میچ 17 جنوری کو ڈونیڈن، چوتھا میچ 19 جنوری کو کراسٹ چرچ اور پانچواں و آخری میچ 21 جنوری کو کراسٹ چرچ میں ہی کھیلا جانا ہے۔