پاکستان ہاکی فیڈریشن نے اولمپک کوالیفائر ایونٹ میں شرکت کے لئے پاکستان ہاکی ٹیم کا اعلان کردیا۔

اولمپک کوالیفائر ایونٹ میں عماد شکیل بٹ قومی ہاکی اسکواڈ کی قیادت کریں گے جب کہ ابوبکر محمود وائس کپتان ہوں گے۔

اولمپئن کلیم اللہ کی سربراہی میں کام کرنے والی قومی ہاکی سلیکشن کمیٹی کی سفارشات پر صدر پی ایچ ایف میر طارق حسین بگٹی کی حتمی منظوری کے بعد 18 رکنی پاکستان ہاکی ٹیم کا اعلان کیا گیا ہے۔

اولمپئن کلیم اللہ خان کی سربراہی میں قومی ہاکی سلیکشن کمیٹی اولمپئن ناصر علی، اولمپئن رحیم خان اور لئیق لاشاری انٹرنیشنل نے حتمی ٹرائلز میں کھلاڑیوں کی کارکردگی کا جائزہ لیا۔

یاد رہے کہ اولمپک کوالیفائر ایونٹ 15 تا 21 جنوری مسقط عمان میں کھیلا جائے گاجس میں شرکت کے لیے پاکستان ہاکی ٹیم کے کھلاڑیوں میں گول کیپرز عبداللہ اشتیاق، وقار، ارباز احمد اور محمد عبداللہ شامل ہیں۔

علاوہ ازیں سفیان خان، عماد شکیل بٹ (کپتان)، ابوبکر محمود (نائب کپتان)، مرتضیٰ یعقوب، عبدالمنان، عقیل احمد، معین شکیل، سلمان رزاق، عبدالحنان شاہد، غضنفر علی، عبدالرحمٰن جونیئر، زکریا حیات، رانا عبدالوحید اشرف اور ارشد لیاقت شامل ہیں۔

ٹیم مینجمنٹ میں ہیڈ کوچ شہناز شیخ، کوچ شکیل عباسی، اسسٹنٹ کوچ اولمپئن دلاور حسین، امجد علی گول کیپر کوچ، وقاص محمود فزیوتھراپسٹ اور محمد عمران خان فزیکل ٹرینر شامل ہیں۔