بنگلادیش کے مایہ ناز آل راؤنڈر شکیب الحسن نے ٹیسٹ اور ٹی ٹوئنٹی انٹرنیشنل سے ریٹائرمنٹ کا اعلان کردیا ہے۔

بنگلادیشی کھلاڑی شکیب الحسن نے اعلان کیا ہے کہ اگر کرکٹ بورڈ بنگلادیش میں الوداعی میچ کھیلنے کی اجازت نہیں دیتا تو بھارت کے خلاف ٹیسٹ میچ میرے کیریئر کا آخری ٹیسٹ میچ ہوگا۔

شکیب الحسن کہتے ہیں کہ میں نے کرکٹ بورڈ سے میرپور میں آخری ٹیسٹ کھیلنے کی خواہش کا اظہار کیا ہے جب کہ بورڈ نے بھی میری بات سے اتفاق کیا ہے۔

انہوں نے بتایا کہ کرکٹ بورڈ کی پوری کوشش ہے کہ میں بنگلادیش جاسکوں جب کہ اس سلسلے میں کرکٹ بورڈ چیزوں کو ترتیب دینے کی بھی کوشش کررہا ہے۔

آل راؤنڈر کا مزید کہنا تھا کہ اگر میرے بنگلادیش جانے کا بندوبست نہیں ہوسکا تو بھارت کے خلاف کانپور میں کھیلے جانے والا میچ میرے کیریئر کا آخری ٹیسٹ میچ ہوگا۔

خیال رہے کہ بنگلادیش کی مستعفی وزیر اعظم شیخ حسینہ واجد کے خلاف ہونے والے مظاہروں کے دوران شکیب الحسن قتل کے ایک مقدمے میں نامزد ہیں۔

انہوں نے اپنے کیریئر میں 70 ٹیسٹ میچز کھیلے ہیں جس میں 38.33 کی اوسط سے 4 ہزار 600 رنز اسکور کیے ہیں جب کہ 31.85 کی اوسط سے ان کی 242 وکٹیں ہیں۔