جدہ: لیجنڈ کرکٹر جاوید میانداد نے سعودی عرب میں پاکستانی اسکول کا دورہ کیا اور طلباء سے کرکٹ سمیت دیگر امور پر تبادلہ خیال کیا جب کہ طلباء نے بھی جاوید میانداد کو اپنے درمیان پاکر انتہائی خوشی کا اظہار کیا۔

پاکستانی کرکٹر ٹیم کے سابق کپتان اور لیجنڈ کرکٹر جاوید میانداد پاکستان انٹرنیشنل اسکول جدہ پہنچے، جہاں قونصل جنرل خالد مجید اور پرنسپل عدنان ناصر سمیت دیگر نے ان کا استقبال کیا جب کہ طلباء کی جانب سے بھی ان کا گرم جوشی کے ساتھ خیر مقدم کیا گیا۔

طلباء سے خطاب کرتے ہوئے جاوید میانداد نے بچوں کو کامیاب زندگی گزارنے کے اصولوں کے بارے میں آگاہ کیا اور کہا کہ محنت اور اچھے اخلاق کے ساتھ زندگی گزاریں، مختلف شعبوں میں کام کرتے ہوئے اپنی بہترین صلاحیتوں کا استعمال کریں تاکہ آپ ایک کامیاب زندگی گزار سکیں۔

جاوید میانداد نے طلباء سے اپنے یادگاری شارجہ چکھے کی یادوں کو بھی تازہ کیا اور کہا کہ وہ سعودی عرب میں مقیم پاکستانی کرکٹرز کی رہنمائی کے لیے حاضر رہیں گے۔

اس موقع پر قونصل جنرل خالد مجید اور پرنسپل عدنان ناصر نے اظہار خیال کرتے ہوئے کہا کہ جاوید میانداد ہمارے قومی ہیرو ہیں اور ہمیں ان پر ناز ہے جب کہ پوری قوم ان پر فخر کرتی ہے۔

انہوں نے اپنے کھیل کے ذریعے دنیا بھر میں پاکستان کا نام روشن کیا ہے آخر میں جاوید میانداد نے طلباء اور طالبات کی ٹیموں کو کرکٹ ٹپس بھی دیں۔