بلاوائیو: قومی ٹیم کے کپتان محمد رضوان زمبابوے کے خلاف سیریز جیتنے کے لیے پرامید ہیں۔

پاکستان اور زمبابوے کی ٹیموں کے درمیان تین ون ڈے انٹرنیشنل میچز پر مشتمل سیریز کل سے شروع ہوگی۔

ون ڈے سیریز کے بعد دونوں ٹیمیں تین ٹی ٹوئنٹی انٹرنیشنل بھی کھیلیں گی۔ تمام میچز بلاوائیو کے کوئنز اسپورٹس کلب میں کھیلے جائیں گے۔

اس ماہ پاکستان کی یہ دوسری ون ڈے سیریز ہے۔ اس سے قبل آسٹریلیا کو اسی کی سرزمین پر دو ایک سے شکست دی تھی۔

عاقب جاوید کی عبوری وائٹ بال ہیڈ کوچ کی حیثیت سے پہلی ون ڈے سیریز ہے۔

اس موقع پر قومی ٹیم کے کپتان محمد رضوان کا کہنا ہے کہ زمبابوے کے خلاف ون ڈے سیریز ہمارے لیے اہم ہے جب کہ ہمارا مقصد اپنی بینچ اسٹرینتھ  کو جانچنا ہے۔

محمد رضوان نے جیت کے تسلسل کو برقرار رکھنے کی امید ظاہر کرتے ہوئے کہا کہ ہم آسٹریلیا کے خلاف تاریخی جیت کا تسلسل جاری رکھنا چاہتے ہیں۔