انٹرنیشنل کرکٹ کونسل (آئی سی سی) کی جانب سے چیمپئنز ٹرافی ٹور کا اعلان کر دیا گیا ہے،  ٹرافی 16 سے 25 نومبر تک پاکستان میں رہے گی۔

آئی سی سی نے پاکستان میں چیمپئنز ٹرافی کے اپنے منظور شدہ ٹور میں ردوبدل کرتے ہوئے نئے ٹور کے شیڈول کا اعلان کر دیا ہے جس کے مطابق ٹورگزشتہ روز سے اسلام آباد میں شروع ہو گیا ہے، جبکہ 25 نومبر تک ٹرافی پاکستان میں رہے گی جہاں اسے مختلف شہروں میں لے جایا جائے گا۔

اسلام آباد میں دامنِ کوہ، فیصل مسجد اور پاکستان منومنٹ سمیت ٹرافی کو اسکول، کالجز اور مختلف سائٹس پر لے جایا جائے گا، جبکہ شعیب اختر ٹرافی کے ہمراہ ہوں گے۔

17 نومبر کو ٹرافی ٹیکسلا اور خانپور جبکہ 18 نومبر کو ٹرافی ٹور ایبٹ آباد میں ہوگی۔

19 نومبر کو ٹرافی مری میں، جبکہ 20 نومبر کو نتھیا گلی، کراچی میں ٹرافی کا ٹور 22 سے 25 نومبر تک ہو گا۔

آئی سی سی چیمپئنز ٹرافی ایونٹ میں شریک تمام ممالک میں جائے گی، پاکستان میں ٹرافی کا ٹور مکمل ہونے کے بعد یہ  26 سے 28 نومبر تک افغانستان کا ٹور کرے گی۔

10 سے 13 دسمبر بنگلا دیش، 15 سے 22 دسمبر تک جنوبی افریقا، 25 دسمبر سے 5 جنوری تک آسٹریلیا میں ٹرافی ٹور ہو گا۔

6  جنوری سے 11 جنوری تک نیوزی لینڈ، 12 سے 14 جنوری تک انگلینڈ اور 15 سے 26 جنوری تک بھارت میں ٹرافی کا ٹور ہو گا۔

آئی سی سی کے مطابق  27 جنوری کو ٹرافی ٹور اختتام ہو گا اور پھر ٹرافی پاکستان آئے گی۔