لاہور: چیئرمین پی سی بی محسن نقوی کا کہنا ہے کہ آئی سی سی میں کہیں ڈینٹ آتا ہے تو پوری کرکٹ کو نقصان ہوگا۔

چیئرمین پی سی بی محسن نقوی نے لاہور میں میڈیا سے گفتگو کرتے ہوئے کہا کہ آج آئی سی سی کی میٹنگ تھی جو ملتوی ہوگئی۔

محسن نقوی نے کہا کہ کسی چیز پر بات نہیں کروں گا، پاکستان مثبت کردار ادا کررہا ہے، آئی سی سی پروگریس کرے گی تو پوری دنیا کی کرکٹ کرے گی۔

ان کا کہنا تھا کہ جیسے ہی دوبارہ میٹنگ ہوئی اور جو چیزیں ہوئیں تو بتادیں گے، آئندہ چند ماہ میں گراؤنڈز کی حالت مزید بہتر کریں گے

چیئرمین پی سی بی کہتے ہیں کہ آئی سی سی میں کہیں ڈینٹ آتا ہے تو پوری کرکٹ کو نقصان ہوگا، کوئی شک نہیں کہ ہماری بات چیت چل رہی ہے۔

محسن نقوی نے کہا کہ پاکستان اور کرکٹ کے لئے بہتر سے بہتر کرنے کی کوشش کررہے ہیں، آئندہ دنوں میں چیزیں بہتر ہوں گی، مایوس نہیں کریں گے۔

انہوں نے مزید کہا کہ قوم کی توقعات سے بڑھ کر چیزیں ہوں گی، ہر شہر میں گراؤنڈ کی دستیابی یقینی بنانے پر توجہ مرکوز ہے۔