انٹرنیشنل کرکٹ کونسل (آئی سی سی) نے مینز ٹی ٹوئنٹی ٹیم آف دی ایئر کا اعلان کردیا ہے جس میں قومی کھلاڑی بابر اعظم بھی شامل ہیں۔

پاکستان کے واحد کھلاڑٰی بابر اعظم آئی سی سی کی مینز ٹی ٹوئنٹی ٹیم آف دی ایئر میں جگہ بنانے میں کامیاب رہے ہیں جب کہ بھارت کے روہت شرما کو ٹی ٹوئنٹی ٹیم آف دی ایئرکا کپتان مقرر کیا گیا ہے۔

علاوہ ازیں ٹی ٹوئنٹی ٹیم آف دی ایئر میں ٹریوس ہیڈ، فل سالٹ، نکولس پورن، سکندر رضا، ہاردک پانڈیا، راشد خان، انندو ہاسارنگا، جسپرت بمرا اور ارشدیپ سنگھ کو شامل کیا گیا ہے۔

بھارت کے سب سے زیادہ 4 کھلاڑیوں کو ٹیم میں شامل کیا گیا ہے جب کہ پاکستان، آسٹریلیا، انگلینڈ، ویسٹ انڈیز، سری لنکا، افغانستان اور زمبابوے کا ایک ایک کھلاڑی ٹیم کا حصہ ہیں۔

نیوزی لینڈ اور جنوبی افریقہ کا کوئی بھی کھلاڑی آئی سی سی ٹی ٹوئنٹی ٹیم آف دی ایئر میں شامل نہیں ہیں۔

گذشتہ روز آئی سی سی مینز ٹیسٹ ٹیم آف دی ایئر، آئی سی سی مینز ون ڈے ٹیم آف دی ایئر، آئی سی سی ویمنز ون ڈے ٹیم آف دی ایئر اور آئی سی سی ویمنز ٹی ٹوئنٹی ٹیم آف دی ایئر کا بھی اعلان کیا تھا۔

واضح رہے کہ صائم ایوب، شاہین آفریدی اور حارث رؤف کو آئی سی سی مینز ون ڈے ٹیم آف دی ایئر اور سعدیہ اقبال کو آئی سی سی ویمنز ٹی ٹوئنٹی ٹیم آف دی میں شامل کیا گیا ہے جب کہ دیگر کسی بھی ٹیم میں کوئی پاکستانی کھلاڑی شامل نہیں۔