ملتان: پاکستان کے خلاف پہلے ٹیسٹ سے قبل ویسٹ انڈیز کے کپتان کریگ بریتھویٹ کا کہنا ہے کہ کنڈیشنز سے ہم آہنگ ہوگئے ہیں اور میچ جیتنے کی پوری کوشش کریں گے۔

ویسٹ انڈیز کے کپتان کریگ بریتھویٹ نے ملتان میں پریس کانفرس کرتے ہوئے بتایا کہ کیمار روچ طبیعت خراب ہونے کی وجہ سے پہلا ٹیسٹ میچ نہیں کھیل سکیں گے۔

کریگ بریتھویٹ کا کہنا ہے کہ جوشوا ڈی سلوا اور اینڈرسن فلپ بھی پہلے 12 رکنی الیون کا حصہ نہیں ہوں گے تاہم کل میچ سے قبل فائنل الیون کا اعلان کریں گے۔

ان کا کہنا تھا کہ پاکستان  کے خلاف سیریز کے لئے تیاری اچھی کی ہے جب کہ یہاں بہترین سہولیات دی گئی ہیں اور ہمیں کوئی شکایت نہیں، تمام کھلاڑی انجوائے کررہے ہیں۔

انہوں نے کہا کہ اسلام آباد اور ملتان کی کنڈیشنز تقریباً ایک جیسی ہیں، کنڈیشنز سے ہم آہنگ ہوگئے ہیں اور میچ جیتنے کی پوری کوشش کریں گے۔

ویسٹ انڈیز کے کپتان نے یہ بھی کہا کہ ہم ورلڈ ٹیسٹ چیمپئن شپ کا یہ سائیکل اچھے انداز میں ختم کرنا چاہتے ہیں، مجھے اپنی ٹیم پر پورا اعتماد ہے کہ وہ کسی بھی ٹیم کے بولرز کا سامنا کرسکتے ہیں۔

انہوں نے مزید کہا کہ ہمیں میچ جیتنے کے لئے تمام 20 وکٹیں لینا ہوں گی، ہمیں جیت کے لئے بہادری کے ساتھ کھیلنا ہوگا۔

خیال رہے کہ پاکستان اور ویسٹ انڈیز کی ٹیموں کے درمیان دو ٹیسٹ میچز پر مشتمل سیریز کا آغاز 17 جنوری سے ملتان کرکٹ اسٹیڈٰیم میں ہونے جارہا ہے، پہلا ٹیسٹ 17 سے 21 جنوری جب کہ دوسرا ٹیسٹ 25 سے 29 جنوری تک کھیلا جائے گا۔