قومی ٹیسٹ ٹیم کے کپتان شان مسعود نے ویسٹ انڈیز کے خلاف ٹیسٹ سیریز کو اہم قرار دے دیا۔

ملتان میں پریس کانفرنس کرتے ہوئے قومی ٹیسٹ ٹیم کے کپتان شان مسعود نے کہا کہ ٹیسٹ کرکٹ ایک مختلف فارمیٹ ہے جس کے اپنے چینلجز اور تقاضے ہیں۔

انہوں نے کہا کہ ویسٹ انڈیز سے سیریز ہمارے لیے بہت اہم ہے اور ہوم کنڈیشنز میں ٹیسٹ سیریزکی بہت اہمیت ہوتی ہے۔

شان مسعود کہتے ہیں کہ ہر کسی کی کوشش ہوتی ہے کہ وہ اپنی بہترین پرفارمنس دے جب کہ ایک سال میں کئی بار ہم جیتنے کی پوزیشن میں آکر میچ ہارے ہیں۔

کپتان کا کہنا ہے کہ ہماری خوائش ہے کہ مزید ٹیسٹ میچز کھیلیں اور اس فارمیٹ میں اپنی بہترین صلاحیتوں کا مظاہرہ کریں۔

انہوں نے بتایا کہ ٹیسٹ میچز کے دوران وقفوں سے اکثر منفرد چینلجز کا سامنا کرنا پڑتا ہے لیکن ہم بہترین کارکردگی کا مظاہرہ کرنے کے لیے پرعزم ہیں۔

خیال رہے کہ پاکستان اور ویسٹ انڈیز کی ٹیموں کے درمیان دو ٹیسٹ میچز پر مشتمل سیریز کا آغاز 17 جنوری سے ملتان کرکٹ اسٹیڈٰیم میں ہونے جارہا ہے۔

پہلا میچ 17 سے 21 جنوری کے دوران کھیلا جائے گا جب کہ دوسرا ٹیسٹ 25 جنوری سے شروع ہوگا جو 29 جنوری تک جاری رہے گا۔