ملتان کرکٹ اسٹیڈٰیم کی پچ پر سعود شکیل نے کہا کہ اس کنڈیشن میں بیٹنگ آسان نہیں، پچ بہت چیلینجگ ہے اس لیے بیٹرز پھنس رہے ہیں۔

پاکستان اور ویسٹ انڈیز کی کرکٹ ٹیموں نے آج ملتان کرکٹ اسٹیڈیم میں ٹریننگ سیشن کیا جس کے بعد میڈیا سے گفتگو کرتے ہوئے پاکستانی اسٹار بلے باز سعود شکیل نے کہا کہ اس کنڈیشن میں بیٹنگ آسان نہیں ہے۔

سعود شکیل کہتے ہیں کہ بورڈ پر اچھا ٹوٹل ہوجائے تو میچ پر گرپ بن جاتی ہے، میں ہمیشہ کوشش کرتا ہوں کہ میری پرفارمنس سے ٹیم جیتے۔

انہوں نے کہا کہ ٹیم رینکنگ بھی معنی رکھتی ہے اور زیادہ اچھا ہوتا ہے کہ آپ کی پرفارمنس سے ٹیم بھی جیتے اور رینکنگ بھی اوپر جائے۔

آئی سی سی ٹیسٹ بیٹرز رینکنگ میں بہتری پر انہوں نے کہا مجھے خوشی ہے کہ میں ٹاپ ٹین بیٹرز میں ہوں، پچ بہت چیلینجگ ہے اس لیے بیٹرز پھنس رہے ہیں۔

سعود شکیل کا کہنا ہے کہ اگر ہم نے یہ طریقہ اپنایا ہے تو میں سمجھتا ہوں ڈومیسٹک میں بھی ایسی پچ تیار کرنی چاہیے، نئی بال پر بیٹنگ کرنا یہاں بہت مشکل ہے۔

سعود شکیل نے مزید کہا کہ میں نہیں سمجھتا یہ پچز نقصان کا باعث بنیں گی، ہمیں اپنی جیت پر خوش ہونا چاہیے جب کہ ہمارے لیے یہ چیلینج بھی ہے۔

واضح رہے کہ پاکستان اور ویسٹ انڈیز کی ٹیموں کے درمیان دو ٹیسٹ میچز پر مشتمل سیریز کھیلی جارہی ہے جس کے پہلے ٹیسٹ میں پاکستان نے 127 رنز سے کامیابی اپنے نام کی ہے۔

دونوں ٹیموں کے درمیان دوسرا اور آخری ٹیسٹ میچ 25 جنوری سے ملتان کرکٹ اسٹیڈیم میں ہی کھیلا جائے گا جب کہ ٹیسٹ میچوں کی یہ سیریز آئی سی سی ورلڈ ٹیسٹ چیمپئن شپ 2023-25 کا حصہ ہے۔