ٹرائنگولر سیریز اور آئی سی سی چیمپئنز ٹرافی کی تیاریوں کے سلسلے میں پاکستانی کرکٹرز نے اپنی رپورٹنگ مکمل کرلی۔

قومی کرکٹ ٹیم کا پہلا چیلنج نیوزی لینڈ اور جنوبی افریقہ کے خلاف ہوگا، جس کے لیے گرین شرٹس اسکواڈ نے آج سے باقاعدہ ٹریننگ کا آغاز کر دیا ہے۔

ٹریننگ کیمپ ڈی ایچ اے اسپورٹس کمپلیکس کے غنی انسٹی ٹیوٹ میں لگایا گیا ہے۔ ابتدائی مرحلے میں کھلاڑی جسمانی ورزشوں پر توجہ مرکوز کریں گے، جس کے بعد بیٹنگ، بولنگ اور فیلڈنگ کی بھرپور ٹریننگ کی جائے گی۔

یاد رہے کہ ٹرائنگولر سیریز کا پہلا میچ پاکستان اور نیوزی لینڈ کی کرکٹ ٹیموں کے درمیان 8 فروری کو قذافی اسٹیڈیم لاہور میں کھیلا جائے گا، جس کے لیے قومی کرکٹرز نے اپنی بھرپور تیاری شروع کر دی ہے۔ شائقین کرکٹ کو امید ہے کہ پاکستانی ٹیم اپنے شاندار کھیل سے توقعات پر پورا اترے گی۔