لاہور: سابق کرکٹر محمد یوسف بیٹی کی علالت کے باعث دورہ نیوزی لینڈ سے دستبردارہوگئے۔

سابق پاکستانی کرکٹر محمد یوسف نے اپنی بیٹی کی علالت کی وجہ سے پاکستان کرکٹ ٹیم کے دورہ نیوزی لینڈ سے دستبردار ہونے کا فیصلہ کیا ہے۔

انہیں پاکستان کرکٹ ٹیم کا بیٹنگ کنسلٹنٹ مقرر کیا گیا تھا لیکن ذاتی وجوہات کی بناء پر انہوں نے اس دورے میں شرکت نہ کرنے کا فیصلہ کیا ہے۔

محمد یوسف نے اپنے اس فیصلے کے بارے میں پاکستان کرکٹ بورڈ (پی سی بی) کو آگاہ کر دیا ہے۔

پی سی بی کے مطابق محمد یوسف کے متبادل کے طور پر کسی نئی تقرری کا فیصلہ نہیں کیا جائے گا۔

واضح رہے کہ پاکستان کرکٹ ٹیم 12 مارچ کو صبح نیوزی لینڈ کے لیے روانہ ہوگی، جہاں وہ پانچ ٹی ٹوئنٹی اور تین ون ڈے انٹرنیشنل میچز کھیلیں گے۔