اسلام آباد: وزیراعظم شہباز شریف نے فٹ بال کے کھلاڑی محمد ریاض سے ملاقات کی اور انہیں 25 لاکھ کی مالی معاونت فراہم کی۔

وزیراعظم محمد شہباز شریف نے ہنگو سے تعلق رکھنے والے فٹ بال کے کھلاڑی محمد ریاض سے ملاقات کی اور ان کی ہمت و حوصلے کی پزیرائی کی جب کہ ملاقات میں وفاقی وزراء عطا اللہ تارڑ، شزہ فاطمہ خواجہ، مشیر وزیرِاعظم رانا ثناء اللہ، چیئرمین وزیرِاعظم یوتھ پروگرام رانا مشہود احمد خان اور میڈیا کوآرڈینیٹر بدر شہباز وڑائچ بھی موجود تھے۔

اس دوران وزیراعظم نے محمد ریاض کو 25 لاکھ روپے کا چیک پیش کیا اور انہیں کھیل جاری رکھنے اور پاکستان میں فٹ بال کے فروغ کے لیے فعال کردار ادا کرنے کی تلقین کی۔

وزیراعظم نے اس موقع پر کہا کہ پاکستانی نوجوان افرادی قوت ملک کا قیمتی اثاثہ ہیں اور حکومت کھلاڑیوں کو ہر قسم کی سہولتیں فراہم کرنے کے لیے پرعزم ہے تاکہ وہ بین الاقوامی سطح پر اپنی صلاحیتوں کا لوہا منواسکیں جب کہ کھلاڑیوں کو مسابقتی سطح پر بہترین وسائل کی فراہمی حکومت کی اولین ترجیح ہے۔

شہباز شریف کا کہنا تھا کہ محمد ریاض جیسے ہونہار کھلاڑیوں کے ٹیلنٹ کو ضائع نہیں ہونے دیا جائے گا اور انہیں ان کے پسند کے وفاقی ادارے میں ملازمت فراہم کی جائے گی۔ انہوں نے ملک کے مایہ ناز کھلاڑیوں کو ان کی صلاحیتوں کے مطابق سرکاری اداروں میں ملازمتیں دینے کی بھی ہدایت کی۔

وزیراعظم نے کہا کہ ملک میں کھیلوں کے فروغ کے لیے اقدامات تیز کیے جائیں گے اور بین الاقوامی سطح پر پاکستان کی نمائندگی کرنے والے کھلاڑیوں کی بہبود اور انہیں روزگار کے پائیدار مواقع فراہم کرنے کے لیے حکمت عملی تشکیل دی جائے گی۔

وزیراعظم نے نوجوانوں کو کھیلوں اور دیگر صحت مند سرگرمیوں میں بڑھ چڑھ کر حصہ لینے کی ترغیب دی جب کہ محمد ریاض نے وزیراعظم کی جانب سے مالی تعاون اور کھلاڑیوں کے فلاح و بہبود کے لیے اقدامات پر ان کا شکریہ ادا کیا۔