قومی کرکٹر امام الحق کو ڈاکٹرز نے کھیلوں کی سرگرمیوں سے دو ہفتے آرام کا مشورہ دے دیا۔

پاکستان کرکٹ ٹیم کے اوپننگ بلے باز امام الحق کو بیٹنگ کے دوران چہرے پر معمولی چوٹ آئی ہے۔

پاکستان کرکٹ بورڈ (پی سی بی) کے ترجمان کے مطابق امام الحق کو فوری طور پر طبی امداد فراہم کی گئی اور بعد ازاں انہیں مزید معائنے کے لیے اسپتال منتقل کیا گیا۔

پی سی بی کے مطابق امام الحق کے سر اور چہرے کا سی ٹی اسکین کیا گیا جس کی رپورٹ معمول کے مطابق آئی ہے۔ ڈاکٹرز نے ان کی انجری کو معمولی نوعیت کی قرار دیا ہے اور بتایا ہے کہ امام اب بہتر محسوس کر رہے ہیں اور ان کی حالت مستحکم ہے۔

تورنگا اسپتال کے ماہرین نے امام الحق کو تمام کھیلوں کی سرگرمیوں سے دو ہفتے آرام کا مشورہ دیا ہے تاہم انہیں ہوائی سفر کے لیے مکمل فٹ قرار دیا گیا ہے۔

پی سی بی کے مطابق ٹیم انتظامیہ اور میڈیکل پینل امام الحق کی صحت پر مسلسل گہری نظر رکھے ہوئے ہے تاکہ ان کی مکمل صحت یابی کو یقینی بنایا جا سکے۔