لاہور: آئی سی سی ویمنز کرکٹ ورلڈ کپ کوالیفائر کے وارم اپ میچ میں پاکستان نے تھائی لینڈ کے خلاف شاندار فتح اپنے نام کرلی۔

پاکستان ویمنز کرکٹ ٹیم نے آئی سی سی ویمنز کرکٹ ورلڈ کپ کوالیفائر کے پہلے وارم اپ میچ میں تھائی لینڈ کو 7 وکٹوں سے شکست دے دی۔ پاکستان نے 18.5 اوورز میں 79 رنز بناکر ہدف حاصل کرلیا۔

پاکستانی اوپننگ جوڑی نے شاندار آغاز فراہم کیا، گل فیروزہ 28 رنز جب کہ شوال ذوالفقار 16 رنز بنا کر آؤٹ ہوئیں۔

اس کے بعد عالیہ ریاض اور سدرہ امین نے 14،14 رنز بنا کر ناقابل شکست رہتے ہوئے ٹیم کو فتح دلائی۔ منیبہ علی ایک رن بنا کر آؤٹ ہوئیں۔

تھائی لینڈ کی ٹیم 28.2 اوورز میں 78 رنز بنا کر آؤٹ ہوگئی۔ پاکستان کی نشرہ سندھو نے شاندار بولنگ کا مظاہرہ کرتے ہوئے 11 رنز دے کر 4 کھلاڑیوں کو آؤٹ کیا۔

ڈیانا بیگ نے 11 رنز دے کر 2 اور رامین شمیم نے 5 رنز دے کر 2 وکٹیں حاصل کیں۔ سعدیہ اقبال اور فاطمہ ثناء نے ایک، ایک وکٹ حاصل کی۔

تھائی لینڈ کی جانب سے پھنیٹہ مایا نے 26 رنز بناکر سب سے زیادہ اسکور کیا۔