راولپنڈی کرکٹ اسٹیڈیم 11 اپریل کو پی ایس ایل 10 کی افتتاحی تقریب کی میزبانی کرے گا۔

پی ایس ایل 10 کی افتتاحی تقریب 11 اپریل کو راولپنڈی کرکٹ اسٹیڈیم میں ہوگی جو شام 7 بجے شروع ہوگی جب کہ اس تقریب میں چھ ٹیموں پر مشتمل ٹورنامنٹ کا آغاز ہوگا۔

ٹورنامنٹ کا افتتاحی میچ دفاعی چیمپئن اسلام آباد یونائیٹڈ اور دو مرتبہ کی فاتح لاہور قلندرز کے درمیان کھیلا جائے گا۔ افتتاحی میچ کی پہلی گیند رات 8.30 بجے پھینکی جائے گی۔

ایونٹ چار مختلف مقامات پر کھیلا جائے گا جن میں کراچی کا نیشنل بینک اسٹیڈیم، لاہور کا قذافی اسٹیڈیم، ملتان کرکٹ اسٹیڈیم اور راولپنڈی کرکٹ اسٹیڈیم شامل ہیں۔

ایونٹ کا فائنل 18 مئی کو قذافی اسٹیڈیم میں ہوگا جب کہ راولپنڈی کرکٹ اسٹیڈیم میں ہونے والی افتتاحی تقریب میں معروف صوفی میوزک آرٹسٹ عابدہ پروین کی پرفارمنس کے ساتھ ینگ اسٹنرز کی پرفارمنس بھی پیش کی جائے گی۔

افتتاحی تقریب میں پی ایس ایل 10 کے ترانے پر ابرار الحق، علی ظفر، نتاشا بیگ اور طلحہٰ انجم بھی پرفارم کریں گے۔ علاوہ ازیں تقریب کے دوران شائقین کو شاندار آتش بازی کا مظاہرہ بھی دیکھنے کو ملے گا۔