امریکہ کے شہر لاؤڈر ہل فلوریڈا میں کھیلے گئے تیسرے اور فیصلہ کن ٹی ٹوئنٹی میچ میں پاکستان نے ویسٹ انڈیز کو 13 رنز سے شکست دے کر تین میچوں کی سیریز 1-2 سے اپنے نام کر لی۔

پاکستانی ٹیم نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 4 وکٹوں کے نقصان پر 189 رنز بنائے۔

بلے باز صائم ایوب نے 66 رنز اور صاحبزادہ فرحان نے 74 رنز کی شاندار اننگز کھیلی، دیگر کھلاڑیوں میں حسن نواز نے 15، محمد حارث نے 2 رنز بنائے جبکہ خوشدل شاہ 11 اور فہیم اشرف 10 رنز کے ساتھ ناٹ آؤٹ رہے۔

ویسٹ انڈیز کی جانب سے جیسن ہولڈر، روسٹن چیز اور شمار جوزف نے ایک ایک وکٹ حاصل کی۔

جواب میں ویسٹ انڈیز کی ٹیم ہدف کے تعاقب میں 6 وکٹوں کے نقصان پر 176 رنز ہی بنا سکی اور مقررہ اوورز میں ہدف حاصل نہ کر سکی۔

 پاکستان کی طرف سے حسن علی، حارث رؤف، صائم ایوب، سفیان مقیم اور محمد نواز نے ایک ایک وکٹ حاصل کی۔

یہ میچ سیریز کا تیسرا اور آخری مقابلہ تھا، جس میں پاکستان نے دو تبدیلیاں کی تھیں، شاہین آفریدی کی جگہ حارث رؤف اور فخر زمان کی جگہ خوشدل شاہ کو ٹیم میں شامل کیا گیا تھا۔