پاکستان کرکٹ ٹیم کے سابق کپتان بابراعظم کی ٹی ٹوئنٹی اسکواڈ میں واپسی کے امکانات ایک بار پھر سے روشن ہونے لگے ہیں۔

نجی خبر رساں ادارے کی رپورٹ کے مطابق پاکستان کرکٹ بورڈ (پی سی بی) فخر زمان کی فٹنس مسائل کے باعث آئندہ سہ فریقی سیریز اور ایشیا کپ 2025 کے لیے بابراعظم کی واپسی پر سنجیدگی سے غور کررہا ہے۔

خیال رہے کہ فخر زمان ویسٹ انڈیز کے خلاف ٹی ٹوئنٹی سیریز کے دوران انجری کا شکار ہوگئے تھے جس کے بعد وہ ون ڈے اسکواڈ سے بھی باہر ہوچکے ہیں۔

پی سی بی نے انہیں فوری طور پر نیشنل کرکٹ اکیڈمی لاہور رپورٹ کرنے کی ہدایت کی ہے، جہاں وہ ری ہیب کے عمل سے گزریں گے۔ تاہم ان کی ایشیا کپ میں دستیابی غیر یقینی قرار دی جارہی ہے۔

پی سی بی حکام کا کہنا ہے کہ فخر زمان کی مکمل فٹنس پر گہری نظر رکھی جارہی ہے لیکن متبادل آپشنز پر بھی غور جاری ہے جن میں بابراعظم نمایاں امیدوار کے طور پر سامنے آئے ہیں۔

تاہم ان کی حتمی شمولیت کا دار و مدار ویسٹ انڈیز کے خلاف ون ڈے سیریز میں ان کی کارکردگی پر ہوگا۔

دلچسپ بات یہ ہے کہ حال ہی میں بابراعظم نے محمد رضوان اور نسیم شاہ کے ہمراہ چیئرمین پی سی بی محسن نقوی سے ویسٹ انڈیز کے خلاف دوسرے ٹی ٹوئنٹی میچ کے دوران ملاقات بھی کی تھی جس سے ان کی واپسی کی خبروں کو مزید تقویت ملی ہے۔

یاد رہے کہ ایشیا کپ 2025 کے لیے اسکواڈ کا باضابطہ اعلان اگست کے دوسرے ہفتے میں متوقع ہے۔ ٹورنامنٹ کا آغاز 9 ستمبر سے ہوگا جہاں افتتاحی میچ افغانستان اور ہانگ کانگ کے درمیان کھیلا جائے گا۔

اس ایونٹ میں کل آٹھ ٹیمیں شرکت کریں گی جنہیں دو گروپس میں تقسیم کیا گیا ہے۔ پاکستان کو گروپ اے میں بھارت، یو اے ای اور عمان کے ساتھ رکھا گیا ہے جب کہ گروپ بی میں بنگلادیش، افغانستان، سری لنکا اور ہانگ کانگ شامل ہیں۔

پاکستان اپنا پہلا میچ 12 ستمبر کو عمان کے خلاف، دوسرا میچ 14 ستمبر کو روایتی حریف بھارت کے خلاف جب کہ تیسرا اور آخری گروپ میچ 17 ستمبر کو یو اے ای کے خلاف کھیلے گا۔