بھارتی کپتان سوریا کمار یادیو کا رویہ ایک بار پھر تنازع کا سبب بن گیا، انہوں نے ایشیاکپ 2025 جیتنے کی صورت میں محسن نقوی سے ٹرافی لینے سے انکار کردیا۔

بھارتی میڈیا کے مطابق سوریا کمار یادیو نے واضح مؤقف اختیار کیا ہے کہ اگر بھارت ایشیاکپ جیتتا ہے تو وہ ٹرافی چیئرمین ایشین کرکٹ کونسل و چیئرمین پی سی بی محسن نقوی کے ہاتھ سے وصول نہیں کریں گے۔

بھارتی ٹیم مینجمنٹ نے کپتان کا یہ مؤقف باضابطہ طور پر ایشین کرکٹ کونسل کو آگاہ کردیا ہے۔

یاد رہے کہ دبئی میں کھیلے گئے میچ کے بعد بھارتی ٹیم نے پاکستان کو سات وکٹوں سے شکست دینے کے باوجود روایتی مصافحہ سے انکار کیا تھا جس پر صورتحال مزید کشیدہ ہوگئی۔

بھارتی کرکٹ بورڈ نے اپنے دفاع میں کہا ہے کہ قوانین کے مطابق کھلاڑی صرف میچ کے اختتام پر مخالف ٹیم کو مبارکباد دینے کے پابند ہیں تاہم ہاتھ ملانے کی کوئی لازمی شرط نہیں۔

دوسری جانب پاکستان کرکٹ بورڈ نے بھی سخت ردعمل دیتے ہوئے آئی سی سی کو ایک اور خط ارسال کیا ہے جس میں متنازع میچ ریفری اینڈی پائیکرافٹ کو ہٹانے کا مطالبہ دہرایا گیا ہے۔

ذرائع کا کہنا ہے کہ پی سی بی نے واضح کردیا ہے کہ اگر پائیکرافٹ کو نہ ہٹایا گیا تو پاکستان ایشیاکپ کے باقی میچز میں شرکت نہیں کرے گا۔

پی سی بی ذرائع نے انکشاف کیا ہے کہ آئی سی سی کی جانب سے پائیکرافٹ کے خلاف کی جانے والی انکوائری محض رسمی کارروائی تھی جس میں نہ تمام پہلوؤں کا جائزہ لیا گیا اور نہ ہی متعلقہ افراد کے بیانات ریکارڈ کیے گئے۔