دبئی: قومی کرکٹ ٹیم آج ایشیاکپ میں متحدہ عرب امارات کے خلاف میچ کے لیے پرعزم ہے، ٹیم ذرائع کے مطابق تمام تیاریاں مکمل کرلی گئی ہیں اور میچ شیڈول کے مطابق ہوگا۔

ذرائع کے مطابق پاکستان ٹیم میچ میں اینڈی پائیکرافٹ کے بغیر ہی میدان میں اترے گی کیونکہ انہیں ریفری کے طور پر قبول نہیں کیا گیا۔

دوسری جانب پی سی بی ذرائع کا کہنا ہے کہ پاکستان اور یو اے ای کے میچ کے لیے رچی رچرڈسن کو میچ ریفری مقرر کیے جانے کا امکان ہے۔

یاد رہے کہ پاکستان کرکٹ بورڈ نے ایشیاکپ کے میچز میں اینڈی پائیکرافٹ کو ہٹانے کا باضابطہ مطالبہ کیا تھا اور واضح کیا تھا کہ اگر انہیں نہ ہٹایا گیا تو پاکستان بقیہ میچز کھیلنے سے انکار کرسکتا ہے۔

آئی سی سی کی جانب سے پہلے خط کو مسترد کرنے کے بعد پی سی بی نے دوبارہ خط ارسال کردیا ہے جس میں ایک بار واضح کیا گیا ہے کہ پاکستان ٹیم اینڈی پائی کرافٹ کی نگرانی میں کسی بھی میچ میں شرکت نہیں کرے گی۔

پی سی بی نے آئی سی سی کی جانب سے کی گئی ابتدائی انکوائری کو محض ’’رسمی کارروائی‘‘ قرار دیا ہے۔ بورڈ کا مؤقف ہے کہ جب تک آئی سی سی باضابطہ اعلان نہیں کرتا، معاملہ آگے نہیں بڑھایا جائے گا۔