ایشیا کپ 2023 کے شیڈول اور ٹرافی کی آج رونمائی کی جائے گی۔

تفصیلات کے مطابق پاکستان کرکٹ بورڈ (پی سی بی) کی مینجمنٹ کمیٹی کے چیئرمین ذکاء اشرف شیڈول اور ٹرافی  کی رونمائی کریں گے۔

ذرائع کا کہنا ہے کہ حتمی شکل دئیے جانے والے شیڈول میں معمولی ردو بدل کیا گیا ہے۔

ایشیا کپ کا آغاز 30 اگست سے ہو گا  جس میں  مجموعی طور پر 13 میچز کھیلے جائیں گے۔ پہلے مرحلے کے تین میچز لاہور میں ہوں گے۔

اس سے قبل ہائی برڈ ماڈل کے تحت ایشیا کپ کے آغاز کا اعلان 31 اگست سے کیا گیا تھا۔

ذرائع کا کہنا ہے کہ افتتاحی میچ پاکستان اور نیپال کی ٹیموں کے درمیان ملتان میں کھیلا جائے گا۔ پاکستان اور نیپال کی ٹیمیں پہلا میچ کھیلنے کے فوری بعد سری لنکا روانہ ہو جائیں گی۔

پاکستان اور بھارت کا میچ 2 ستمبر کو کینڈی میں ہوگا جبکہ سپر فور مرحلے کا پاک بھارت میچ 10 ستمبر کوکینڈی میں  ہونے کا امکان ہے۔

ایشیا کپ کا فائنل 17 ستمبر کو کولمبو میں کھیلا جائے گا۔

تمام میچز پاکستانی  وقت کے مطابق دوپہر ایک بجے شروع ہوں گے۔

پاکستان ، بھارت اور نیپال گروپ اے میں شامل ہیں جبکہ سری لنکا،  بنگلہ دیش اور افغانستان گروپ بی میں شامل ہیں۔

گروپ کی ٹاپ دو ٹیمیں سپر فور مرحلے کے لیے کوالیفائی کریں گی۔

اب تک شیڈول کے مطابق سپرفور مرحلے کا بھی ایک میچ لاہور میں کھیلے جانے کا امکان ہے۔ چھ ستمبر کو لاہور میں سپر فور مرحلے کا میچ اے  ون اور بی ٹو ٹیموں کے درمیان رکھا گیا ہے ۔