ٹیسٹ کرکٹر شاداب خان کا کہنا ہے کہ کوچز پر الزام لگانا یا گروپنگ کی بات فضول ہے۔

تفصیلات کے مطابق   کرکٹر شاداب خان  نے راولپنڈی ون فائیو خدمت مرکز لیاقت باغ کا دورہ کیا اور  شہریوں کو خدمت مرکز میں پہنچائی جانے والی سہولیات کا جائزہ لیا۔

انچارج خدمت مرکز نے شاداب خان کو خدمت مرکز میں فراہم کردہ سہولیات کے بارے میں آگاہ کیا۔

پولیس اہلکاروں نے کرکٹر شاداب خان کے ساتھ سیلفیاں بھی بنوائیں۔

اس موقع پر میڈی سے گفتگو کرتے ہوئے شاداب خان نے کہا کہ   بیرون ممالک کی طرز پر اس خدمت مرکز میں بھی بہترین سہولیات دی جارہی ہیں۔ایک ہی چھت کے نیچے لائسنس کی فراہمی، ملازمین کا اندارج اور دیگر انفارمیشن کی فراہمی بہترین اقدام ہے۔

شاداب خان نے کہا کہ پولیس کے بارے میں عوام کا  اچھا امیج بنانے میں ابھی مزید وقت لگے گا۔ بطور انسان ایک دوسرے کا احترام کرنا چاہیے۔

پاکستان کی بنگلادیش سے حالیہ تاریخی شکست سے متعلق شاداب خان نے کہا کہ کرکٹ میں جب آپ ہارنا شروع کرتے ہیں تو کبھی کبھار جیتنا بھول جاتے ہیں۔ایک میچ جیت گئے تو پھر جیت کا ذائقہ آجائے گا۔

انہوں نے کہا کہ ہمیں گراس روٹ لیول پر چیزیں بہتر کرنے کی ضرورت ہے۔ میری رائے میں کلب کرکٹ ختم ہو رہی  ہے، اسے بہتر کرنا  ہوگا کیونکہ  بچہ جب کلب سے ہی کرکٹ شروع کرتا ہے ، اس کی  جڑیں اچھی ہونی چاہئیں۔

شاداب خان نے مزید کہا کہ کوچز پر الزام لگانا یا گروپنگ کی باتیں  کرنا فضول باتیں  ہیں۔