انگلش کرکٹ ٹیم کے کپتان بین اسٹوکس کا کہنا ہے کہ ٹیسٹ سیریز میں  شکست سے کافی مایوسی ہوئی ہے۔

پاکستان کے خلاف ٹیسٹ سیریز میں  شکست کے بعد انگلینڈ کرکٹ ٹیم کے کپتان بین اسٹوکس نے کہا کہ پاکستان نے بہترین کارکردگی کا مظاہرہ کیا۔

بین اسٹوکس نے کہا کہ ہمیں چیلنجز کا سامنا تھا لیکن کرکٹ نام ہی چیلنج کا ہے۔اس سیریز سے سبق سیکھ کر نیوزی لینڈ کے خلاف میدان میں اتریں گے۔

انہوں نے کہا کہ پاکستانی اسپنرز نعمان علی اور ساجد خان کو کریڈٹ جاتا ہے۔ دونوں نے بہترین بولنگ کا مظاہرہ کیا۔

انگلش کپتان کا کہنا تھا کہ ان کنڈیشنر میں کھیلنا بہت بڑا چیلنج تھا لیکن بطور پروفیشنل ہم کنڈیشنر کا بہانہ نہیں بناسکتے۔ پاکستان کو کریڈٹ جاتا ہے کہ انہوں نے پچھلے دو میچز میں اچھی کارکردگی کا مظاہرہ کیا۔

بین اسٹوکس نے مزید کہا کہ یہ کافی طویل دورہ تھا۔ اس سیریز سے بہت کچھ سیکھنے کو ملا۔ مستقبل میں ایشیاء کی کنڈیشنز  میں بہتر کارکردگی دکھانے کی کوشش کریں گے۔

ان کا کہنا تھا کہ کس صورتحال میں کس طرح بیٹنگ اور بولنگ کرنی ہے اس چیلنجنگ ماحول میں کھیل کر بہت اچھے سے اندازہ ہوا ہے۔