ریئل می ایک  چینی موبائل کمپنی ہے جس نے بہت ہی کم عرصے میں موبائل اور اسمارٹ فونز کی دنیا میں اپنی ایک الگ پہچان بنالی ہے۔

حال ہی میں اس کمپنی کی جانب سے منعقد کی جانے والی ایک تقریب میں نیا فلیگ شپ اسمارٹ فون متعارف کرایا گیا ہے جسے  جی ٹی نیو 2  کا نام دیا گیا ہے۔

کمپنی کے مطابق تمام اپ ڈیٹس کے نتیجے میں فون کا درجہ حرارت 18 سینٹی گریڈ تک کم رکھنے میں مدد مل سکتی ہے اور مجموعی کارکردگی اوریجنل جی ٹی نیو سے 20 فیصد زیادہ بہتر ہے۔

فون میں 5000 ایم اے ایچ کی بیٹری 65 واٹ فاسٹ چارجنگ سپورٹ کے ساتھ دی گئی ہے اور کمپنی کا کہنا ہے کہ ڈیوائس صرف 36 منٹ میںن صفر سے 100 فیصد تک چارج ہوسکتی ہے۔

جی ٹی نیو 2 میں 6.6 انچ کا امولیڈ ڈسپلے فل ایچ ڈی پلس ریزولوشن اور 120 ہرٹز ریفریش ریٹ کے ساتھ دیا گیا ہے۔

ریفریش ریٹ کو سوئچ کرنے کے لیے بھی یو آئی مینیو فون کا حصہ ہے اور اس کا ٹچ سیمپلنگ ریٹ بھی 600 ہرٹز کا ہے۔

اینڈرائیڈ 11 آپریٹنگ سسٹم کا امتزاج رئیل می یو آئی 2.0 سے کیا گیا ہے جبکہ فرنٹ پر پنچ ہول ڈیزائن میں 16 میگا پکسل کیمرا دیا گیا ہے۔

رئیل می جی ٹی نیو 2 میں 6 جی بی، 8 جی بی اور 12 جی بی ریم اور 128 سے 256 جی بی اسٹوریج کے آپشن دیئے گئے ہیں۔

کمپنی نے ایک منفرد کولنگ جیل کا استعمال بھی کیا ہے جبکہ ایک ایرو اسپیس گریڈ گرافین شیٹ کا استعمال بھی کیا ہے۔

یہ فون سب سے پہلے چین میں 27 ستمبر سے دستیاب ہوگا۔

اس کا 6 جی بی ریم اور 128 جی بی اسٹوریج والا ماڈل 2399 یوآن (62 ہزار پاکستانی روپے سے زائد) میں دستیاب ہوگا جبکہ 12 جی بی ریم اور 256 جی بی اسٹوریج والا فون 2999 یوآن (78 ہزار پاکستانی روپے سے زائد) میں فروخت کیا جائے گا۔