آج کے اس دور میں ارنیٹ کا استعمال بہت عام ہے اور ہر کسی کی پہنچ میں بھی ہے کیونکہ یہ اب بہت سستے داموں میں مل جاتا ہے۔

جہاں انٹرنیٹ کی سہولت وقت کی ضرورت ہے وہیں اس کے بہت سے اثرات بھی ہیں جو انسان کی شخصیت کو بری طرح متاثر کر رہے ہیں حال ہی میں ہونے والے ایک سروے سے معلوم ہوا تھا کہ انٹرنیٹ استعمال کرنے والوں کی دوڑ میں پہلا نمبر سعودی عرب کا آتا ہے ۔

اس سروے سے معلوم ہوا تھا کہ انٹرنیٹ اور موبائل کا زیادہ استعمال کرے کے باعث دنیا بھر میں زیادہ تر لوگ نیند سے محروم ہوگئے ہیں۔

اسی سروے کی بناء پر برطانوی کمپنی سوشل امپیکٹ کارپوریشن کے تعاون سے مکہ مکرمہ میں المودہ سوسائٹی فار فیملی ڈویلپمنٹ نے اپنی مہم “اسے استعمال کریں، اس کے عادی نہ بنیں”کے عنوان سے شروع کی ہے۔

اس مہم کے تحت ایک سروے کیا گیا جس میں 1200 افراد حصے دار تھے، سروے میں معلومات جاننے کے لیے سوالات آن لائن اور سوشل میڈیا کے ذریعے بھیجے گئے جس سے پتا چلا کہ 46 فیصد لوگ دن میں دو سے پانچ گھنٹے سوشل میڈیا پر گزارتے ہیں یا آن لائن گیمز کھیلتے ہیں۔

ایسے افراد جنہوں نے دن میں 6 گھنٹے سے زیادہ وقت انٹرنیٹ کے ساتھ گزارا ان کی تعداد 36 فیصد تھی جبکہ دن بھر میں صرف ایک گھنٹہ انٹرنیٹ استعمال کرنے والوں کی تعداد صرف 6 فیصد تھی جس سے اندازہ لگایا گیا کہ سعودی شہری بڑی تعداد میں انٹرنیٹ سے جڑ چکے ہیں اور کافی وقت اسے دیتے ہیں۔

خیال رہے کہ  یہ مہم معاشرے کے ایک بڑے طبقے میں انٹرنیٹ کی لت کے خطرات اور کئی میڈیا چینلز کے ذریعے علاج کے طریقوں کے بارے میں آگاہی بڑھانے کے لیے شروع کی گئی ہے۔