آج سے کچھ سال قبل جب اینڈرائیڈ فونز کا زمانہ نہیں تھا تب صرف ایک ہی فون ہر کسی کے معیار پر اترتا تھا ، وہ ہے نوکیا کا 6310 جو کہ کمپنی نے بند کردیا تھا۔

نوکیا کمپنی کا یہ فون مضبوطی کی علامات تھا اور اس کو استعمال کرنا بھی ہر ایک کے لئے بہت آسان تھا لیکن اب کمپنی نے اسے نئے فیچرز کے ساتھ ایک بار پھر فروحت کے لئے پیش کردیا ہے۔

کمپنی کی جانب سے نوکیا 6310 میں 2.8 انچ کا ڈسپلے خم ایجز کے ساتھ دیا گیا ہے جبکہ کی پیڈ بھی اس کا حصہ ہے۔

فون کے اندر 8 ایم بی ریم اور 16 ایم بی اسٹوریج دی گئی ہے جس میں ایس ڈی کارڈ سے 32 جی بی تک اضافہ کیا جاسکتا ہے۔

فون کے بیک پر 0.3 میگا پکسل کیمرا ہے اور ہاں ایف ایم ریڈیو اور فلیش ٹارچ کو بھی نوکیا 6310 میں برقرار رکھا گیا ہے۔

فون میں تھری ٹون ڈیزائن کو دیا گیا ہے جو اوریجنل فون سے کچھ زیادہ مماثلت نہیں رکھتا۔

پرانا 6310 فون کا ڈیزائن کافی مختلف تھا اور اس کے بٹن بھی نئے ماڈل سے مختلف تھے، یہاں تک کہ کلر اسکیم بھی مختلف ہے۔

اس فون کو برطانیہ میں 60 پاؤنڈ (14 ہزار پاکستانی روپے سے زائد) میں فروخت کے لیے پیش کیا گیا ہے اور آنے والے ہفتوں میں یہ دیگر ممالک میں بھی دستیاب ہوگا۔