نظام شمسی کے سیارے زہرہ  کے بارے میں تحقیق کے لیے روس اور امریکا کے خلائی تحقیقاتی اداروں کے درمیان معاہدہ طے پا گیا ہے۔

روسی خلائی تحقیقی ادارے روسکوسموس کے مطابق، امریکا کے ساتھ مل کر وینس کی جانب ایک خلائی مشن بھیجا جائے گا۔

اس ادارے کے سربراہ کا کہنا ہے کہ  اس طرح معاشی کے علاوہ تیکنیکی حوالے سے درپیش چیلنجز سے نمٹنا بھی آسان ہو جائے گا۔

ناسا کے مطابق امریکا سیارے زہرہ پر 2030-2028 کے درمیان دو مشن بھیجنے کی منصوبہ بندی کررہا ہے۔ ڈیپ ایٹماسفیئر وینس انویسٹیگیشن آف نوبل گیسز، کیمسٹری اینڈ ایمیجنگ(DAVINCI+) ایک تحقیق پر مشتمل ہے جس میں زہرہ سیارے کے ڈھکے ہوئے ماحول میں اُترا جائے گا۔دوسرا مشن جس کا نام وینس،ایمیسیویٹی، ریڈیو سائنس، اِنسار، ٹوپوگرافی اینڈ اسپیکٹرواسکوپی (VERITAS) ہے، میں ایک ریڈار سیارے کے گرد چکر لگائے گا اور ان بادلوں کے پار دیکھے گا جنہوں نے سیارے کی سطح کو زمین  پر موجود ماہرین سے چھُپا کر رکھا ہے۔

زہرہ نظام شمسی میں ہمارے نزدیک ترین سیارہ ہے اور اس کا حجم بھی ہماری زمین کے قریب برابر ہی ہے تاہم اس کی سطح کا درجہ حرارت کئی سو ڈگری سینٹی گریڈ ہے۔