آسٹریلیا نے الفابیٹ اور فیس بک جیسی دنیا کی بڑی ٹیکنالوجی کمپنیوں کے خلاف انکوائری کرنے کا اعلان کردیا ہے۔

غیر ملکی خبر رساں ایجنسی کے مطابق آسٹریلوی وزیراعظم اسکاٹ موریسن نے آج ذرائع ابلاغ سے گفتگو کرتے ہوئے کہاہے کہ ان بڑی ٹیکنالوجی کمپنیوں کو یہ بات یقینی بنانی چاہیئے کہ ان کے پلیٹ فارمز استعمال کنندگان کے لیے محفوظ ہیں۔

آسٹریلوی وزیر اعظم کا کہنا تھا کہ ہم دنیا کی بڑی ٹیک کمپنیوں کے طرز عمل پر بڑے پیمانے پر پارلیمانی انکوائری کریں گے جس کے لیے نئی قانون سازی کی ضرورت ہے۔ ان کا کہنا تھا کہ آسٹریلیا الفابیٹ ( گوگل کی بانی کمپنی) اور فیس بک جیسی کمنپیوں کو لگام دینے کے لیے عالمی کوششوں کی سربراہی کرے گا، ہم نئی قانون سازی کریں گے جو کہ دوسروں کے لیے مثال بن سکے۔

اضافی ریگولیشن کے امکانات کے بارے میں پوچھے گئے سوال پر موریسن کا کہنا تھا کہ ان کمپنیوں کے خلاف کی جانے والی نئی انکوائری بہت وسیع پیمانے پر کی جائے گی۔ جس میں کمیٹی کے قانون سازوں سے سوشل میڈیا پلیٹ فارمز( فیس بک، ٹوئٹر، انسٹا گرام، لنکڈ ان، وغیرہ) کی جانب سے استعمال کیے جانے والے الگورتھم کی تحقیقات کرنے کا کہا جائے گا۔ ان کمپنیوں سے اس بات کا جواب بھی طلب کیا جائے گا کہ یہ اپنے استعمال کندگان کی عمر اور شناخت کی تصدیق کس طرح کرتی ہیں اور ان کی جانب سے کس نوعیت کی پابندیاں عائد کی جاتی ہیں۔

آسٹریلوی وزیر اعظم نے میڈیا کو بتایا کہ ان بڑے ٹیک جائینٹ کو بڑے سوالات کے جوابات دینے ہیں۔ ان بڑی کمپنیوں نے یہ پلیٹ فارمز بنائے ہیں تو پھر  اپنے استعمال کنندگان کے لیے ان پلیٹ فارمز کو محفوظ بنانے کی ذمے داری بھی انہی پر عائد ہوتی ہے۔

اس نئی انکوائری کے انچارج 15 فروری 2022 تک اپنی فائنڈنگز پر رپورٹ پیش کریں گے۔

آسٹریلیا کی جانب سے انکوائری کے اعلان سے بہ ظاہر آسٹریلوی حکومت اور میٹا( فیس بک کا پرانا نام) اور گوگل کے درمیان تناؤ میں اضافہ ہوگا۔
یاد رہے کہ رواں سال کے آغاز میں آسٹریلیا نے نئے قوانین لاگو کیے تھے جس کی رُو سے ٹیکنالوجی کمپنیوں کو کانٹینٹ کی مد میں مقامی ذرائع ابلاغ کا ادائیگیاں کرنے کا پابند کیا گیا تھا۔