خلاء میں موجود ناسا کی ہبل اسپیس ٹیلی اسکوپ نے کروڑوں نوری سال کے فاصلے پر موجود تین کہکشاؤں کے تصادم کی زبردست تصویر کھینچی ہے۔

یہ خلائی تصادم تین کہکشاؤں کے ملاپ کے نام سے جانا جاتا ہے، جس میں تین کہکشائیں آہستہ آہستہ ایک دوسرے کے قریب آ رہی ہیں اور اپنی کششِ ثقل سے ایک دوسرے کو چیر رہی ہیں۔

کائنات میں اس طرح کے ملاپ عام سی بات ہیں اور تمام بڑی کہکشائیں، بشمول ہماری ملکی وے، ان ملاپ کی وجہ سے اتنی بڑی ہیں۔

بظاہر افراتفری میں دِکھنے والے ان وقوعات میں تباہی سے زیادہ تخلیق ہوتی ہے۔

جب تینوں کہکشاؤں کی گیسز آپس میں ٹکرائیں گی اور کنڈینس ہوں گی تو مٹیریل کا ایک وسیع سمندر تشکیل پائے گا جس سے نئی یکجا ہونے والی کہکشاں میں نئے ستارے ابھریں گے۔

موجودہ ستارے اس تصادم میں بچ جائیں گے، انہیں زیادہ نقصان نہیں ہوگا۔ جبکہ تینوں کہکشاؤں کے درمیان کششِ ثقل کی رسہ کشی موجودہ ستاروں کے مدار کو موڑ دے گی۔

چونکہ ستاروں کے درمیان فاصلہ بہت زیادہ ہوتا ہے اس لیے ان میں تصادم کے امکانات کم ہی ہوں گے۔

ناسا کے مطابق جو کہکشاں تصویر میں اوپر کی جانب ہے اس کا نام IC 2431 ہے جو زمین سے 68 کروڑ 10 لاکھ نوری سال کے فاصلے پر کینسر نامی ستاروں کے جھرمٹ میں ہے۔

کہکشاؤں کے اس ملاپ کی، ’گلیکسی زُو‘ نامی سٹیزن سائنس پروجیکٹ میں شریک ماہرینِ فلکیات نے نشان دہی کی