میٹا کی ذیلی کمپنی انسٹاگرام نے اعلان کیا ہے کہ سوشل میڈیا ایپ اپنی نیوز فیڈ پر دِکھنے والی پوسٹ کی ترتیب تبدیل کرے گی۔

سماجی رابطے کی ایپلی کیشن کے سربراہ ایڈم موسیری کے مطابق کمپنی اصلی کانٹینٹ کو زیادہ واضح کرے گی بجائے ان پوسٹ کے جو کہیں اور سے ری شیئر کرائی گئی ہوں۔

اس کا مطلب ہوگا کہ وہ پوسٹ دِکھنا کم ہوجائیں گی جس میں رِیلز شیئر کی گئی ہوں گی۔

موسیری کے مطابق اس اقدام کا مرکز صریحتاً اصلی کانٹینٹ ہے۔

انہوں نے مزید کہا کہ اگر آپ بالکل نئی چیز بنا رہے ہیں تو آپ کو زیادہ کریڈٹ ملنا چاہیئے بجائے اس کے کہ آپ کوئی چیز ری شیئر کریں جو آپ کو کہیں پوسٹ ہوئی ملی ہو۔ ہم ری شیئر کی گئی پوسٹ کی نسبت اصلی کانٹینٹ کی کوشش اور اس کو زیادہ قدر دینے جارہے ہیں۔

یہ انسٹا گرام کی جانب سے گزشتہ مہینوں میں کی جانے والی متعدد اہم تبدیلیوں میں سے ایک ہے، جو کمپنی کی جانب سے حریف کمپنیوں، جیسے کہ ٹِک ٹاک، سے لاحق خطرے سے نمٹنے کے لیے کی گئیں ہیں۔

انسٹاگرام سربراہ موسیری کا کہنا تھا کہ تازہ ترین تبدیلیوں کا مقصد لوگوں کو زیادہ کانٹینٹ بنانے میں مدد کا تھا۔

انہوں نے کہا کہ تخلیق کار انسٹاگرام کے مستقبل کے لیے بہت اہم ہیں اور کمپنی اس بات کو یقینی بنانا چاہتی ہے کہ وہ کامیاب ہوں اور انہیں وہ کریڈٹ ملے جس کے وہ مستحق ہیں۔