فیس بک نے سات سال بعد اپنی سروس انسٹنٹ آرٹیکلز کو بند کرنے کا فیصلہ کر لیا ہے۔

میٹا کی جانب سے انسٹنٹ آٹیکلز ختم کرنے کا یہ فیصلہ اس بات کو واضح کرتا ہے کہ اب میٹا فوری خبروں سے دوری اختیار کر کے ویڈیو کو اپنا محور بنا رہا ہے۔

 حال ہی میں میٹا کے ترجمان نے اپنے بیان میں کہا ہے کہ پبلشرز کو مطلع کر دیا گیا ہے کہ اپریل 2023 کے وسط سے میٹا انسٹنٹ آرٹیکلز کو سپورٹ کرنا ختم کر دے گا۔

 انہوں نے کہا کہ پبلشرز کے پاس متبادل تلاش کرنے کے لیے 6 ماہ کا وقت ہے، تاہم انسٹنٹ آرٹیکلز سے جڑی وہ ٹریفک جو فیس بک پر رہے گی، وہ پبلشر کے ویب پیج پر ہی جائے گی۔

میٹا کے ترجمان کا کہنا ہے کہ فیس بک فیڈ میں نیوز آرٹیکلز کے لنکس والی پوسٹس اس وقت بہت ہی کم دیکھی جا رہی ہیں، دنیا بھر سے یہ تعداد 3 فیصد سے بھی کم رہ گئی ہے۔

 چناں چہ بطور کاروبار اس کی کوئی وجہ نہیں ہے کہ اس چیز میں سرمایہ کاری کی جائے جو صارفین کی ترجیحات کے مطابق نہ ہو۔

میٹا نے اس بات کا اندازہ ٹک ٹاک کی بے پناہ مقبولیت سے لگایا ہے کہ اب لوگ نیوز آرٹیکلز پڑھنے کے بجائے ویڈیوز میں زیادہ دلچسپی رکھتے ہیں۔