امریکی خلائی ادارے ناسا کی جانب سے انسانوں کو چاند پر 2025 تک بھیجے جانے کا امکان ہے۔

لیکن اس سے بھی پہلے ایلون مسک کی کمپنی اسپیس ایکس 2023 میں ہی انسانوں کو چاند پر لے جانے کے لیے تیار ہے اور یہ خلاباز نہیں بلکہ عام افراد ہوں گے۔

حال ہی میں جاپان سے تعلق رکھنے والے ارب پتی یوساکوما یزاوا نے ایک ویڈیو پیغام میں کہا ہے کہ ایلون مسک کی کمپنی اسپیس ایکس کی جانب سے وہ چاند پر جائیں گے۔

انہوں نے کہا کہ جنوبی کورین گلوکار ٹی او پی، یوٹیوبر ٹم ڈوڈ، اداکار دیو جوشی اور فوٹوگرافر کریم ایلیا اس مشن میں ان کے ساتھ ہوں گے۔

امریکی اسنو بورڈر Kaitlyn Farrington اور جاپانی ڈانسر Miyu کو بیک اپ میں رکھا گیا ہے۔

اسپیس ایکس کی جانب سے اسٹارشپ کے ذریعے ان کو چاند پر بھیجا جائے گا اور فی الحال کمپنی نے مشن میں تاخیر کا اعلان نہیں کیا۔

واضح رہے کہ یوساکوما یزاوا نے دسمبر 2021 میں انٹرنیشنل اسپیس اسٹیشن جاکر پہلے خلائی سیاح کا اعزاز حاصل کیا تھا، انہیں ستمبر 2018 میں اسپیس ایکس نے چاند کے پہلے نجی سیاحتی دورے کے لیے منتخب کیا تھا۔

2021 میں انہوں نے لوگوں کو کہا تھا کہ وہ انہیں ویڈیوز بھیجیں تاکہ وہ چاند کے مشن پر ان میں سے کچھ افراد کو منتخب کرسکیں۔