واٹس ایپ کی جانب سے ایسے فیچر پر کام جاری ہے جس کا انتظار صارفین برسوں سے کر رہے تھے۔

واٹس ایپ نے اگست 2021 میں تصاویر اور ویڈیوز کی پرائیویسی اور ایپ کی میموری کو بچانے کیلئے ‘ویو ونس’ کا فیچر متعارف کرایا تھا۔

جس کے تحت بھیجی جانیوالی تصویر یا ویڈیو ایک بار کھلنے کے بعد چیٹ سے مکمل طور پر غائب ہوجاتی ہے لیکن اب اس کو مزید بہتر بنانے پر کام جاری ہے اور ٹیکسٹ میسجز کو بھی اس فیچر کا حصہ بنایا جارہا ہے۔

 میٹا کی زیرملکیت میسجنگ ایپ کی اپ ڈیٹس پر نظر رکھنے والی سائٹ WABetaInfo کے مطابق اینڈرائیڈ ایپ کے نئے بیٹا ورژن میں اس فیچر کو بہتر بنانے کا عندیہ دیا گیا ہے۔

اس فیچر کے تحت صارفین ایسے تحریری پیغامات بھی بھیج سکیں گے جو ایک بار پڑھنے کے بعد دوبارہ نظر نہیں آئیں گے۔

اس فیچر سے ایک بہت بڑی آسانی یہ ہو گی کہ صارفین حساس معلومات جیسے پاس ورڈ یا کریڈٹ کارڈ کی تفصیلات وغیرہ شیئر کر سکیں گے۔

جب یہ فیچر صارفین کو دستیاب ہوگا تو ایپ میں سینڈ بٹن کے ساتھ ایک تالے کا آئیکون نظر آئے گا۔

مگر فی الحال اس فیچر پر کام کیا جارہا ہے اور بیٹا ورژن کے صارفین کو بھی دستیاب نہیں، تو ہوسکتا ہے کہ مزید کچھ تبدیلیاں کی جائیں۔