گوگل نے جی میل میں اہم ترین سکیورٹی فیچر کا اضافہ کر دیا ہے۔

گوگل نے ایک بلاگ پوسٹ میں بتایا ہے کہ کمپنی کی جانب سے اینڈ ٹو اینڈ انکرپشن کا فیچر جی میل سروس کا حصہ بنایا جارہا ہے۔

کمپنی گوگل ڈرائیو، ڈاکس، شیٹس، سلائیڈز اور میٹ میں اس فیچر کا اضافہ کرچکی ہے لیکن اب جی میل کے لیے اسے متعارف کروایا جارہا ہے، مگر تمام صارفین کو اس فیچر تک رسائی حاصل نہیں ہوسکے گی۔

کلائنٹ سائیڈ انکرپشن (ای 2 ای ای) نامی اس فیچر کو جی میل کے ویب ورژن میں متعارف کروایا جارہا ہے اور گوگل ورک اسپیس صارفین اس کے ذریعے انکرپٹڈ ای میلز بھیج سکیں گے۔

گوگل نے سپورٹ ویب سائٹ میں بتایا ہے کہ صارفین اپنی انکرپشن کیز کو استعمال کرکے ڈیٹا کو انکرپٹ کرسکیں گے مگر جیسا اوپر درج کیا جاچکا ہے کہ یہ فیچر تمام صارفین کے لیے دستیاب نہیں ہوگا، صرف گوگل ورک اسپیس انٹرپرائز پلس، ایجوکیشن پلس اور ایجوکیشن اسٹینڈرڈ استعمال کرنے والے صارفین اسے استعمال کرسکیں گے۔

واضح رہے کہ یہ سروسز استعمال کرنے والے صارفین 20 جنوری 2023 تک اس فیچر کے بیٹا ورژن کے لیے اپلائی کرسکتے ہیں۔

یہ فیچر بائی ڈیفالٹ ان ایبل نہیں ہوگا بلکہ صارف کو خود جاکر ایسا کرنا ہوگا۔